Ilahn 91 - Uwumbɔr aagbaŋ

Uwumbɔr u ye timi aakikiir na

¹ Unii umɔk chaa Uwumbɔr chee ti ban nkiirm na, unii umɔk bi Uwumbɔr Mpɔɔnsakpiindaan aaŋaal ni na

² ga bui u ke, “Sin le kii mi ki joo mi. Sin le ye Maawumbɔr, sin pu le m mak.”

³ U ga nyan si tibɔbir timɔk bɔɔ na ni, ni nkun aaween mɔmɔk ni.

⁴ U ga taln waafeen biin aa pu; aa ga kan u chee ŋŋmarm; waaŋann le ga li kii si ki joo si.

⁵ Saan san kinyeek aajawaan ibaa, kaan san nwiin pu aabɔlirkaan tibaa,

⁶ kaan san tiweenbir ti chur binib mbɔmbɔɔn ni na, kaan san nwiin pu aawanbir ti ku na.

⁷ Nibaakan, lichur ga lir ki kpo aa chee, le ŋichur kipiik kpo ki dɔ goln si, le nibaa aan ŋa sin ma.

⁸ Aa ga lik le ki kan Uwumbɔr aah dar bibiindam aatafal pu na.

⁹ Aa di Uwumbɔr le ŋa u kiir si na, uma Uwumbɔr u kaa kpa ŋeen aatɔ na le ye saakikiir,

¹⁰ kina pu na, kinimbɔŋ kibaa aan kan si, mbimbinpɔɔl mubaa aan duun ni saadichal.

¹¹ Uwumbɔr ga cha waatuuntiib li joo si ki li kii si nimɔk aa cha na.

¹² Bi ga li joo si biŋaal ponn ni paacham, aataal taa gbeer ŋitakpal.

¹³ Aa ga taa taa ichinn ni ikuub pu, aa ga taa taa ichinn ni ikuub i bir na pu.

¹⁴ Uwumbɔr bui ke, “M ga gaa binib bi gee mi na lii, ki li kii binib bi nyi mi ke m ye Uwumbɔr na.

¹⁵ Bi yaa yin mi kan, m ga kii baayim; bi yaa bi tibɔr ni kan, m ga li bi bi chee. M ga nyan bi tibɔr ni, ki nyuŋ bi.

¹⁶ M ga di limɔfafɔfɔŋ le tii bi; m ga gaa bi lii.”