Ilahn 90 - Uwumbɔr aagbaŋ

Uwumbɔr ni unibɔn

¹ Uwumbɔr, n‑yoonn mɔmɔk kan, sin le ye timi aakookoo yaan.

² Waahr aan aa nin naan ŋigongon ni dulnyaa na, aa nan ye Uwumbɔr u kaa kpa ndoon na, ki ga li beenin ye Uwumbɔr ki ti saa n‑yoonn mu kaa kpa ndoon na.

³ Aa tuk unibɔn ke u ki gir ŋa waah nan ye tiwan ni na; aa cha u ki gir kpaln titan.

⁴ Ŋibin lichur naahn liwinbaal le aa chee; ŋi bi ke fen u jer na la, ki naahn kikurk kibaa aah ga yunn kinyeek pu na.

⁵ Aa joo timi cha ke nwam na la; timi aamɔfal aa fɔk ke tidaŋ na la. Ti naahn timoor ti ga punn kichakpiik ni,

⁶ ki muun mala ki kpaan faa mpuun, le kijook kan, ti kuur ki kpo na la.

⁷ Saaŋuul le kuln timi; saaŋuusakpeln cha ijawaan chur timi la.

⁸ Aa joo timi aatunwanbir bilni aanimbiin ni, hali timi aatunwanbir ti bɔr na, aa joo bilni nin chee aa ga li waa ti na la.

⁹ Saaŋuul le junn timi aamɔfal; timi aamɔfal wɔŋni ke tibɔlɔikaan na la.

¹⁰ Timi aabin ye imonko itaa ni kipiik baanja la, le binib bi pɔɔ na fuur imonko inaa; tɔ, ŋi mu aah joo ni tiwan ni na tii timi na le ye tibɔr ni nsuubiin; limɔfal kpaan doo le na, timi aadoon le na.

¹¹ Ŋma kee kan saaŋuul aapɔɔn mbamɔm? Ŋma nyi saaŋuusakpeln aah ga joo ni ijawaan i na.

¹² Mɔk timi, timi aamɔfal aafɔfɔk aah ye pu na, aan ti ŋa nlan.

¹³ Saaŋuul ga ki yunn ki ti saa kinye? Uwumbɔr, san saatutum kinimbaak.

¹⁴ Kichakpiik mɔk ni kan, di saageehm mu bi n‑yoonn mɔmɔk na gbiin timi, aan ti gaa ilahn ki li kpa mpopiin ki ti saa timi aamɔfal aadoon.

¹⁵ Tii timi mpopiin dandana wee ke saah nan tii timi mpombiin pu timi aafalaa aabin mɔmɔk yoonn na.

¹⁶ Cha timi saatutum kan saapɔɔn sakpiin aatun; Cha timi aayaabitiib kan saapak sakpeŋ.

¹⁷ Tidindaan Uwumbɔr, cha saanyoor li bi ti pu. Tii timi tinyoor timi aatun mɔmɔk ni.