Ilahn 9 - Uwumbɔr aagbaŋ

Uwumbɔr aah ye ibamɔndaan pu na aadoon

¹ Uwumbɔr, m ga di nsui mɔmɔk pak si, m ga len saah ŋa lijinjiir aawan ni mɔmɔk na aabɔr.

² Sin pu le m ga di mpopiin gaa ilahn. Uwumbɔr Mpɔɔnsakpiindaan, m ga gaa ilahn ki pak si.

³ Maadim yaa kan si kan, le bi fenn bipuwɔb, ki lir ki kpoi.

⁴ Aa si chob saabɔjil ni, le ki len tibɔr kpeei m pu.

⁵ Aa bii binib bi kaa nyi si na, le ki ku door bibiindam; ubaa aan ki teer bibɔr daalbaadaal.

⁶ Timi aadim doo kookoo a; aa kuln baatim, le ubaa aa ki teer bibɔr.

⁷ Le Uwumbɔr tee ye ubɔr n‑yoonn mɔmɔk; u gor waabɔrjal kiir libɔjil.

⁸ Ibamɔn pu le u joo dulnyaa wee; u joo ibamɔn le ji ŋinibol aabɔr.

⁹ Uwumbɔr le gaal bimukdam lir, tibɔr aayoonn kan, uma chee le bi kani lifuur.

¹⁰ Uwumbɔr, binib bi nyi si na ga tii si naadii; Saa siir cha umɔk dan aa chee na.

¹¹ Gaa ilahn ki pak Uwumbɔr u bi Sionn pu ki joo waanib na man. Bui linibol mɔmɔk man waah ŋa pu na.

¹² Uwumbɔr teer binib bi ji falaa na pu; waa suln baawiil bɔr, le ki dar binib bi tun bi taani na aatafal.

¹³ Uwumbɔr, san mi kinimbaak. Lik maadim aah ŋani mi falaa pu na. Uwumbɔr, nyan mi nkun ni,

¹⁴ aan m ŋmaa sil Jerusalem aanib aanimbiin ni, ki bui bi tiwan nimɔk pu m pak si na. Saah gaa mi lii pu na le m mɔɔni.

¹⁵ Binib bi kaa nyi si na gbii libuul, le ki lir li ponn ni; bibaa aagaawɔb mam le chur bi.

¹⁶ Uwumbɔr aah joo ibamɔn ji tibɔr pu na, le u cha ti bee waah bi pu na; le bibiindaan aatunwanbir chur bi ke gaawɔb na.

¹⁷ Uwumbɔr aah tii bibiindam ni binib bi mɔmɔk yii u na liwangol li na le ye nkun.

¹⁸ Uwumbɔr aan suln binib bi kaa kpa na bɔr; le bigiim aamakl aan doo kookoo.

¹⁹ Uwumbɔr, fiin. Taa cha binib bii si. Kuun ni binib bi kaa nyi si na aanimbiin ni, ki nan bui bi baabɔr aah bii pu na.

²⁰ Uwumbɔr, cha bi li san ijawaan; cha bi bee ke bi ye tiwan ni ga kpo na la.