Ilahn 89 - Uwumbɔr aagbaŋ

Litimbol aabɔbir aayoonn aalahn

¹ Uwumbɔr, n‑yoonn mɔmɔk m ga li gaa ilahn saageehm mu bi n‑yoonn mɔmɔk na pu; m ga li mooni ke aa ŋani saah len pu na ki ti saa n‑yoonn mu kaa kpa ndoon na.

² M nyi ke saageehm ga li bi n‑yoonn mu kaa kpa ndoon na, ki nyi ke aa tun saah puu tipuur ti na, kaa kpelni daalbaadaal ke kitaapaak aah kaa kpelni pu na.

³ Aa len ke, “M puu tipuur tii uja u m lee u na, uma le ye maatutunn David; m puu tii u ke,

⁴ ‘Aayaabil ga li ye ubɔr n‑yoonn mɔmɔk; m ga cha bi li ye binaanjirb ki ti saa n‑yoonn mu kaa kpa ndoon na.’”

⁵ Paacham aawan gaa ilahn saatukpaan na pu la; Uwumbɔr, bi gaa ilahn saah ŋani saah len pu na pu.

⁶ Uwumbɔr, ubaa aa bi paacham ki bi ke sin na; paacham yaab ubaa aaŋeen aatɔ aa ye si.

⁷ Saatuuntiib aakuun ni kan, bi mɔmɔk pak si la; le bi mɔmɔk san si ijawaan.

⁸ Tidindaan Uwumbɔr, Mpɔɔnsakpiindaan, ubaa aa bi ki kpa mpɔɔn ke sin na; Uwumbɔr, aa ŋani saah puu pu na mɔmɔk la.

⁹ Sin le joo nnyusakpem mu pɔɔ sakpen na; aa cha mu aanyunkpenn doon suuna.

¹⁰ Aa wɔb kipeewanbiik Rahab, ki ku ki; aa di saapɔɔn sakpiin le nyaŋ saadim.

¹¹ Paacham ni kitiŋ mɔmɔk ye sin yaan la, sin le naan dulnyaa ni tiwan ni mɔmɔk bi u ni na.

¹² Sin le naan ŋŋangan ni ŋŋangii; Tabor Aajool ni Hemonn Aajool gaa mpopiin aalahn aa pu.

¹³ Saapɔɔn nyaŋ a. Aa kpa mpɔɔn sakpen a.

¹⁴ Saanaan si mbimbinyaan ni ibamɔn pu la; saatuln mɔmɔk ni kan, saageehm ni saah bi chob pu na nyani mpaan pu la.

¹⁵ Binib bi joo ilahn dooni si, aan ki bi saaŋann aawiin ni na kpa mpopiin.

¹⁶ Sin pu le bi mɔɔni n‑yoonn mɔmɔk, le ki pak si, saaŋann pu.

¹⁷ Aa tii timi ŋinyaŋ sakpiin, saageehm cha ti nyaŋ.

¹⁸ Uwumbɔr, sin le nyan timi aakikiir, sin Israel yaab Aawumbɔr u bi chain na le tii timi, timi aabɔr.

Uwumbɔr aah puu tipuur ti tii David na

¹⁹ N‑yoonn mu jer na le aa nan kpiir tuk saatutum bi dii si mbamɔm na ke, “M tii butɔb aajakpaan ubaa nterm; m di libɔrjal tii unii u m lee u binib ngbaan ponn ni na.

²⁰ M di maakpan mu bi chain na kpir maatutunn David aayil pu, ki ŋa u ubɔr.

²¹ Maapɔɔn ga li bi u chee n‑yoonn mɔmɔk, maapɔɔn le ga tii u mpɔɔn.

²² Waadim aan ŋmaa nyaŋ u daalbaadaal; bibiindam aan ŋmaa nyaŋ u.

²³ M ga ku waadim, ki ku binib bi mɔmɔk nan u na.

²⁴ M ga li gee u, ki li si upuwɔb; m ga cha u li kani linyaŋ.

²⁵ M ga taln waanaan ki nya Kaasisik ni Aanyusakpem mɔk ki ti saa Yufrates Aamɔɔl mɔk.

²⁶ U ga bui mi ke, ‘Sin le ye nte, ni Maawumbɔr; sin le ye maakikiir, sin le ye u gaal mi lir na.’

²⁷ M ga ŋa u njapɔpol, uma le ga li ye ubɔrkpaan u jer bibɔrb mɔmɔk na.

²⁸ M ga li joo maah puu tipuur ti na tii u n‑yoonn mɔmɔk, le min ni uma aamɔbaan ga li bi ki ti saa n‑yoonn mu kaa kpa ndoon na.

²⁹ Uyaabitiib aan doo ke kitaapaak aah kaa door pu na; uyaabil ga li ye ubɔr n‑yoonn mɔmɔk.

³⁰ Tɔ, uyaabitiib yaa yii, kaa dii maakaal, kaa bi ke maah mɔk bi pu na,

³¹ ki yaa kaa lik faar maamɔkm, kaa joo maakaal kan,

³² m ga daa bitafal, baatunwanbir pu; m ga cha bi ji falaa, baataani pu.

³³ Tɔ, m ga li beenin gee David ma, ki ga li beenin joo maah puur tipuur ti na tii u.

³⁴ Maan bii maah puu tipuur tii u na, kaan bar tipuur ngbaan pu kibaa.

³⁵ M puu maayimbil li bi chain na pu ke maan gii inyamɔn tuk David.

³⁶ U ga li kpa yaabitiib n‑yoonn mɔmɔk, le m ga li lik waanaan pu ki ti saa dulnyaa aadoon.

³⁷ Waanaan ga li si chob ke uŋmal u ye kitaapaak aaseeraadaan bamɔnn na aah si chob pu na.”

Ubɔr aalirm aawiil

³⁸ Le saaŋuul fii saah lee ubɔr u na pu; aa siir cha u ki yii u.

³⁹ Aa bii tipuur ti aa nan puu tii saatutunn ngbaan na, ki di waabɔryikpupuk mee lii tikpakpar ni.

⁴⁰ Aa tur waatiŋ aagon lii kitiŋ, le ki cha waajawan aadir kpaln ŋilangben.

⁴¹ Unii umɔk jer na su waawangol la; binib bi koo gbɔk u na laa u la.

⁴² Aa di linyaŋ tii waadim; ki tii bi mpopiin.

⁴³ Aa cha waajawan aa ki kpa tinyoor, ki cha bi nyaŋ u butɔb ni.

⁴⁴ Aa chuu gaa u chee nnaan aajaangbeek ki di waabɔrjal mee lii kitiŋ,

⁴⁵ Aa cha u por kaa kee fuu waayoonn, ki cha u kpaln unimɔɔnii.

Ŋŋmarm aameel

⁴⁶ Uwumbɔr, aa ga di aabaa bɔr kookoo la aa? Saaŋuul ga li wu ke mmii na ki ti saa bayoonn?

⁴⁷ Teer ke maamɔfal aa fɔk; teer ke aa naan ti mɔmɔk aan ti ye tiwan ni ga kpo na la.

⁴⁸ Ŋma ga li bi kaan kpo? Unibɔn aan ŋmaa mɔk ke waan kpo.

⁴⁹ Ndindaan, saajan aageehm na bi la chee? Saah nan puu tipuur ti tii Ubɔr David na bi la chee?

⁵⁰ Taa suln baah seei mi saatutunn pu na bɔr, taa suln binib bi kaa nyi si na aamɔpuur aah lir m pu pu na.

⁵¹ Uwumbɔr, saadim seei saah lee ubɔr u na. Bi seei u waah cha nin chee mɔmɔk na la.

⁵² Pak Uwumbɔr n‑yoonn mɔmɔk man. Amii, amii.