Ilahn 88 - Uwumbɔr aagbaŋ

Limeel li ban nterm na

¹ Ndindaan Uwumbɔr u gaal mi lir na, m wii le nwiin ti lir, le kinyeek kan, m bi aanimbiin ni.

² Ŋun maameel; li pel maah wii ki ban nterm pu na.

³ Tibɔr pam le kan mi, le maa ki daa nkun chee.

⁴ M gur bi ke unii mɔk aah ti ban u kpo kan u bi pu na la, maa ki kpa mpɔɔn mubaa.

⁵ Bi di mi ki di mee bitekpiib chee la; m gur bi ke baah ku binib bi na aah dɔ baakaakul ponn ni pu na la, ki naahn binib bi aa suln bibɔr kookoo na la, ki bi ke binib bi kaan ki kan saaterm na.

⁶ Aa di mi mee lii likaakul taab la, aa di mi mee lii mbuu mu nyoo ki bɔɔn sakpen na ponn ni la.

⁷ Saaŋuul dɔ nyik m pu la, le laanyunyuun nyii mi bil taab.

⁸ Aa cha njɔtiib san cha mi; aa cha m gur nu bi chee la. M gur ye kaasisik ni aajangeln la kaan ŋmaa minn buen nibaa chee;

⁹ falaa pu, nnimbil aa ki waa mbamɔm. Uwumbɔr, idaa mɔmɔk, m yin si la le ki yoor ŋŋaal paacham ki mee si.

¹⁰ Saa tun iwaan aatun tii bitekpiib. Baa fii sil ki pak si.

¹¹ Baa len saageehm mu bi n‑yoonn mɔmɔk na pu likaakul ni. Baa len saah tun saapuur aatun ŋi na aabɔr kitekpiitiŋ ni.

¹² Baa kani saatukpaan na mbɔmbɔɔn aah bi nin chee na, kaa kani saaŋann kitiŋ ki bi suln kaanib bɔr na ni.

¹³ Uwumbɔr, m yin si ki ban nterm la; m mee si kichakpiik mɔmɔk ni.

¹⁴ Uwumbɔr, ba ŋa aa yii mi? Ba ŋa aa fenn aapuwɔb tii mi?

¹⁵ Maah fii ubo pu na, m ji falaa le ki duun nkun; saah dar ntafal pu na, le maa ti ki kpa mpɔɔn mubaa.

¹⁶ Saaŋuusakpeln le nyiir mi bilni; maah san si ijawaan pu na le bii mi doo.

¹⁷ Kitaak yaa woln kan, i mann goln mi ke nwam na le nwiin ti lir; i gob mi ŋipepel mɔmɔk pu la.

¹⁸ Aa cha njɔnyaan mu ti san cha mi, le mbɔmbɔɔn baanja gur ye njɔ.