Ilahn 86 - Uwumbɔr aagbaŋ

Limeel li ban nterm na

¹ Uwumbɔr, pel m chee ki kii maayim, ba pu? maa kpa uteter, kaa kpa mpɔɔn mu.

² Maah keei saamɔb pu na, nyan mi nkun ni; gaa mi lii, m ye saatutunn u tii si naadii na la.

³ Aa ye Maawumbɔr la, san mi kinimbaak; m mee si le nwiin ti lir.

⁴ Uwumbɔr, tii mi saatutunn mpopiin, ba pu? maameel chaa aa chee paacham.

⁵ Aa kpa ti pu tiŋann le ki joo cha pinni timi aatunwanbir; saageehm mu bi n‑yoonn mɔmɔk na bi binib bi mee si na chee.

⁶ Uwumbɔr, pel maameel; ŋun maah wii ki ban nterm pu na.

⁷ Saah keei maameel pu na, le m yin si buyoonn m bi tibɔr ni na.

⁸ Uwumbɔr, liwaal libaa aa bi ke sin na, ubaa aa kee ŋa tiwan ni aa ŋa na.

⁹ Saah naan ŋitimbol ŋi mɔmɔk na ga dan ki nan gbaan aanimbiin ni; bi ga pak saah tun ŋitukpaan ŋi na.

¹⁰ Saapɔɔn nyaŋ, le aa tun ŋitukpaan; sin baanja le ye Uwumbɔr.

¹¹ Uwumbɔr, mɔk mi saah ban ke m tun pu na, le m ga kii saamɔb mbamɔm; mɔk mi saasan aan m di nsui mɔmɔk tun saatuln.

¹² Ndindaan Uwumbɔr, m ga di nsui mɔmɔk pak si, m ga li mooni saah tun ŋitukpaan ŋi na pu n‑yoonn mɔmɔk.

¹³ Saageehm mu aa kpa m pu n‑yoonn mɔmɔk na nyaŋ sakpen a. Aa nyan mi likaakul ni.

¹⁴ Uwumbɔr, bigaadam choo ki ban mi la; bibiindam le kuun ki ban bi ku mi, bi ye binib bi aatafal aa bi aa ni na la.

¹⁵ Uwumbɔr, le aa ma ye Uwumbɔr u san kinimbaak ki kpa ngeehm na, ki kpa suklaa ni tiŋann, ki ŋani saah puu ke aa ga ŋa pu na n‑yoonn mɔmɔk.

¹⁶ San mi kinimbaak ki fenn lik ni mi; gaa mi lii ki tii mi mpɔɔn, ba pu? m ye saatutunn ki tun tii si ke unaagbiija na.

¹⁷ Uwumbɔr, mɔk mi saaŋann aamɔkl; binib bi nan mi na yaa kan ke aa ter mi ki tii mi mmɔɔn kan, bi ga ji inimɔɔn.