Ilahn 84 - Uwumbɔr aagbaŋ

Uwumbɔr Aadichal aaneen

¹ Uwumbɔr Mpɔɔnsakpiindaan, m gee Saadichal sakpen.

² M gee sakpen ke m li bi li ponn ni. M neen ke m li bi Uwumbɔr Aadichal ni. M di nsui mɔmɔk gaa mpopiin aalahn tii Uwumbɔr u bi n‑yoonn mɔmɔk na.

³ Uwumbɔr Mpɔɔnsakpiindaan u ye maabɔr ni Maawumbɔr na, iyaar ŋa yaanyandil la, le naakpaa mam kpa bido, baabim bi duun saatork aabimbiln la.

⁴ Binib bi koo Saadichal ni na kpa mpopiin, le ki gaa ilahn ki pak si n‑yoonn mɔmɔk.

⁵ Binib bi aapɔɔn nyan ni aa chee na kpa mpopiin, le bi neen ke bi chuun buen Sionn Aajool paab.

⁶ Baah dii Baka aafatankuun ni ki jer na, le nima chee kpaln uyayak aanyunbun ŋmeen; le unaalantaal cha tibɔr gbiin nima.

⁷ Baah cha na le bi moo pɔɔk; bi ga kan dindatiib mɔmɔk Aawumbɔr Sionn pu.

⁸ Ndindaan Uwumbɔr, Mpɔɔnsakpiindaan, ŋun maameel. Uwumbɔr u n‑yaaja Jakob nan dii u na, li pel.

⁹ Uwumbɔr, ŋa saanyoor ŋa timi aabɔr u sin aabaa lee u na pu.

¹⁰ M yaa bi Saadichal ponn ni nwiin mubaa kan, ni ŋan jer ke m li bi nibaa chee iwiin lichur; m yaa si Maawumbɔr Aadichal aabisamɔb kan, ni soor ni ke m li koo bibiindam do.

¹¹ Tidindaan Uwumbɔr le ye timi aakikiir, ni timi aabɔr u kpa kipak sakpen na, u ŋani timi tiŋann ki tii timi bunyuŋ. Binib bi aabimbin ŋan na, waa cha bi lanni tiwanyaan nibaa.

¹² Uwumbɔr, Mpɔɔnsakpiindaan, binib bi tii si naadii na kpa mpopiin.