Ilahn 83 - Uwumbɔr aagbaŋ

Limeel li ban ke Israel yaab nyaŋ baadim na

¹ Uwumbɔr, taa li ŋmin; taa li si suuna ki ŋmin kina.

² Lik, saadim fii sil aa pu la, le binib bi nan si na fii sil aa pu.

³ Bi bi looni ki kpokl saanib pu la; saah kii binib bi na, le bi bi kpokl bi pu.

⁴ Bi len le ke, “Dan man aan ti ti bii doo Israel yaab aatimbol, aan ubaa taa ki teer bi pu ki ti saa n‑yoonn mu kaa kpa ndoon na.”

⁵ Bi kpokl le ki kii tii tɔb, le ki ŋa limaantɔl ki fii sil aa pu;

⁶ Edom ni Ismael yaab kpaani la; le Moab yaab ni Hagar yaab kpaan;

⁷ le Gebel yaab, ni Amonn yaab, ni Amalek yaab kpaan, le Filistia ni Taya yaab mu kpaan.

⁸ Asiria yaab mu kpee Amonn ni Moab yaab bi ye Lot aayaabitiib na pu, ki pɔɔ pam.

⁹ Ŋa bi ke saah nan ŋa Midiann yaab, ni Sisera, ni Jabinn pu, Kisonn Aamɔɔl ni pu na.

¹⁰ Aa nan nyaŋ bi Endor aatiŋ pu, le bi dɔ nima ki ti bur.

¹¹ Ŋa baayidam ke saah nan ŋa Oreb ni Seeb pu na; nyaŋ baasalolm ke saah nan nyaŋ Seba ni Salmuna pu na.

¹² Bi mɔmɔk nan len ke “Ti ga gaa kitiŋ ki ye Uwumbɔr aatiŋ na.”

¹³ Uwumbɔr, yaa bi ke kitangbaak na, cha bi yaa ke libuln aah yaani timoor pu na.

¹⁴ Mmii aah wu kichook pu na, ni mmiigaal aah cha ŋigongon paab gaal mmii pu na,

¹⁵ di saataabuŋ ki pɔɔ na jenn bi, ki cha saabuŋ ki kpa ijawaan na faan bi.

¹⁶ Uwumbɔr, cha bi kpaln binimɔɔndam, ki cha bi bee saah kpa mpɔɔn pu na.

¹⁷ Cha bi lir ki san ijawaan ki ti saa n‑yoonn mu kaa kpa ndoon na; cha bi kpoi nnimɔɔnkun.

¹⁸ Cha bi bee ke sin baanja le ye Uwumbɔr, ki ye kitiŋ kee aayidaan u kaa kpa ŋeen aatɔ na.