Ilahn 81 - Uwumbɔr aagbaŋ

Kitork aajim aalahn

¹ Uwumbɔr u ye timi aakikiir na pu, di mpopiin teen mpɔɔn pu man; gaa kipak aalahn tii Uwumbɔr. Uma le tiyaaja Jakob mu nan dii.

² Piin ŋigangan aagbaam man, ki li gbaa ŋidabun man; li joo tibar mɔmɔk aabɔŋ gbaa ki gaa ilahn i mɔ na man.

³ Pii kakaan njim ngbaan pu, uŋmapɔɔn aayoonn, ni uŋmapiin aayoonn.

⁴ Nimina ye nkaal le ki tii Israel yaab; Jakob Aawumbɔr le siin mu.

⁵ Buyoonn u nan tak Ijipt yaab na, le u nan di mu tii Israel yaab. M ŋun nneel mubaa bi len ke,

⁶ “M chuu gaa nimi aatun ŋi nyuun na; m cha ni tuur nimi aatun ŋi nyuun ki ye ŋitambil na bil.

⁷ Buyoonn ni nan bi tibɔr ni na, le ni nan yin mi, le m gaa nimi lii. M nan bi maabɔbɔryaan mu ye kitaabuŋ ni na, le ki kii nimi aayim ngbaan. M nan tɔŋ nimi Meriba aanyunbun na chee.

⁸ Maanib, li pel man tibɔr ti m joo sur nimi na; Israel yaab, m ba gee sakpen ke ni li ŋun tii mi.

⁹ Ni taa ki doon liwaal libaa kpala.

¹⁰ Min le ye Nidindaan Uwumbɔr u nyan ni nimi Ijipt aatiŋ ni na. Waar nimɔi man, aan m kpiin nimi.

¹¹ Le maanib aa ŋun tii mi; Maanib Israel yaab aa kii tii mi.

¹² Kina pu le m cha bi kpa tafalaaŋun le ki ŋani baah gee pu na.

¹³ M ba gee sakpen ke maanib li kpa ŋuntii ki tii mi; m ba gee sakpen ke bi li keei maamɔb.

¹⁴ M ba ga ŋa mala ki nyaŋ baadim, ki daa bi mɔmɔk aatafal.

¹⁵ Binib bi nan mi na ba ga san ijawaan ki nan gbaan nnimbiin ni; baatafadaan aa ba ga li kpa ndoon.

¹⁶ Le m ba ga di njikaabim mu ŋan sakpen na kpiin nimi ki cha ni ji tisiir ti bab.”