Ilahn 80 - Uwumbɔr aagbaŋ

Limeel li ban ke litimbol gir sil litaa pu na

¹ Israel yaab Aakikiir, li pel ni ti chee; sin u lolni saanib pu nsan na, ŋun ni ti chee. Sin u ka saabɔrjal pu, tiwan ni kpa ifeen na aapaacham,

² di aabaa mɔk Efraim, ni Benjaminn, ni Manase aanibol. Mɔk timi saapɔɔn, ki nan gaa timi lii.

³ Uwumbɔr, giin ni timi aabaa chee. San timi kinimbaak, aan ti ŋmar.

⁴ Tidindaan Uwumbɔr, Mpɔɔnsakpiindaan, ni ga yunn kinye aan saaŋuul ti sɔŋ saanib aameel pu?

⁵ Aa tii timi mpombiin le ke ti ji ki tii timi tinyunyunn kiyikusakpeŋ ni ke ti nyu.

⁶ Aa cha ŋitimbol ŋi mann goln timi na jaa timi aatiŋ pu; timi aadim seei timi la.

⁷ Uwumbɔr Mpɔɔnsakpiindaan, giin ni timi aabaa chee. San timi kinimbaak, aan ti ŋmar.

⁸ Aa nan di ŋisubil aasub nyan ni Ijipt aatiŋ ni; aa nan jenn nyan ŋinibol le ki di bu ŋum baatiŋ ni.

⁹ Aa nan beer mpaan tii bu ke bu muun; busub ngbaan aanyaan nan chɔb baan, le bu taln gaa kitiŋ ngbaan mɔmɔk pu.

¹⁰ Bu aaboon nan biin ŋigongon pu; le bu aapan too chaar santina aasui i fɔk sakpen na pu.

¹¹ Bu nan taln bu aapan ti fuu Kaasisik ni Aanyusakpem na chee, ki ti ki saa Yufrates aamɔɔl ni.

¹² Ba ŋa aa chuu ber idɔ i aa nan di gob bu na? Unii umɔk jer bu chee dandana wee na ga ŋmaa su bu aasubil;

¹³ ipɔɔgbeer le ga taa taa ŋaasubil pu, le ipeel ga li joo ŋi ŋmɔ.

¹⁴ Uwumbɔr Mpɔɔnsakpiindaan, fenn lik ni timi. Aa bi paacham; li lik ni timi; dan ki nan gaa timi saanib lii.

¹⁵ Ti ye saasubil aasub bu aa nan ŋum aan bu laa ye buwaatiir, aan aa cha bu kpa mpɔɔn na, dan ki nan gaa timi lii.

¹⁶ Timi aadim gaa bu lii a, le ki see bu mmii; di saaŋuul lik bi ki kuln bi.

¹⁷ Li kii ki kaan binib bi aa lee aan bi ye linibol li aa tii mpɔɔn na.

¹⁸ Taan ki fenn tipuwɔb tii si daalbaadaal; cha ti li kpa limɔfal aan ki pak si.

¹⁹ Tidindaan Uwumbɔr, Mpɔɔnsakpiindaan, giin ni timi aabaa chee. San timi kinimbaak, aan ti ŋmar.