Ilahn 79 - Uwumbɔr aagbaŋ

Limeel li ga ban litimbol aaŋmarm na

¹ Uwumbɔr, binib bi kaa nyi si na koo ni saatiŋ ni. Bi bii Saadichal li bi chain na, le ki cha Jerusalem gur ye tilangbenn.

² Bi cha nangba mam gbaa saanib aawon, ipeel le ŋman saatutum aanann.

³ Bi cha saanib aasin nyan ke nnyun na; nsin nan puu ni kookoo Jerusalem ponn ni ke nnyun na la, le unii aa nan gur ke u sub ŋinikpol.

⁴ Ŋitimbol ŋi mann goln timi na seei timi la; bi laa timi le ki ŋani timi mbɔnyun.

⁵ Uwumbɔr, saaŋuul ga li bi ti pu n‑yoonn mɔmɔk la aa? Saaŋuul ga li beenin gaal ke mmii na la aa?

⁶ Cha li fenn lir binib bi kaa dooni si na pu, Cha li fenn lir binib bi kaa mee limeel tii si na pu,

⁷ ba pu? bima le ku saanib; bi kuln saatingbaln a.

⁸ Taa di tiyaajatiib aatunwanbir daa timi aatafal. San timi kinimbaak dandana wee; taa ki kpa limakl libaa.

⁹ Uwumbɔr, ter timi, ki gaa timi lii; sin aabaa aanyuŋ pu, gaa timi lii, ki di cha timi aatunwanbir pinn timi.

¹⁰ Ni ŋa kinye aan ŋitimbol baa timi ke, “Nimi Aawumbɔr bi la chee?” Ŋitimbol aah cha saatutum aasin nyan pu na, cha ti kan saah ga daa bitafal pu na.

¹¹ Li pel binib bi bi tiyondir ponn ni na aah ker idun pu na, ki di saapɔɔn mu nyaŋ na nyan binib bi bi siin ke bi ku bi na lii.

¹² Uwumbɔr, pa ŋitimbol ŋi seei si ŋisiibil mɔmɔk aabɔŋ na nfum mulole pu baah seei si pu na.

¹³ Le timi saanib bi ye saadiik ni yaab na, ga doon si ki ti saa n‑yoonn mu kaa kpa ndoon na, ki li pak si n‑yoonn mɔmɔk ki cha.