Ilahn 77 - Uwumbɔr aagbaŋ

Itaakpayɔl yoonn aasuudoon

¹ M wii mpɔɔn pu ki yin Uwumbɔr, m wii mpɔɔn pu, le u ŋun maawiil pu.

² Limukl yoonn le m mee Uwumbɔr. Kinyeek ni kitaak aawoln pu, m yoor ŋŋaal paacham le ki mee u, le kaa tee kani nsuudoon.

³ M yaa ka ki dak Uwumbɔr aabɔr kan, le m faa liŋuun; m yaa ka dak suuna kan, le nwon yɔl ti lir.

⁴ U cha m dɔ waa le kitaak ti woln; ni muk mi sakpen, le maa ti ki ŋmaa len tibɔr.

⁵ M dakl lik iwiin i jer na; le ki teer ŋibin ŋi jer n‑yaayoonn na.

⁶ M dɔ kinyeek ki dak ilandak sakpiin la; m dɔ suuna, le ki baa mbaa tibɔr timina;

⁷ “Uwumbɔr ga li yiil timi n‑yoonn mɔmɔk la aa? Waan ki li kpa mpopiin ti pu uu?

⁸ U di cha kaa ki tii timi ngeehm la aa? Waah puu tipuur ti na aa ki si la aa?

⁹ Uwumbɔr suln kaa ki san kinimbaak la aa? Liŋuul le gaa kinimbaak aabuul ni ii?”

¹⁰ Le m bui ke, “Tiwan ni wu mi sakpen na le ye nimina; ke Uwumbɔr u kaa kpa ŋeen aatɔ na aa ki ter timi ke waah nan ter timi n‑yoonn mu jer na.”

¹¹ Uwumbɔr, m ga teer saah tun ŋitukpaan ŋi na bɔr; m ga teer ŋitukpaan ŋi aa tun n‑yoonn mu jer na bɔr.

¹² M ga kal ki dakl lik tiwan ni mɔmɔk aa ŋa na, m ga kal suuna ki dakl lik saatukpaan ngbaan.

¹³ Uwumbɔr, saah ŋa tiwan ni mɔmɔk na bi chain la, liwaal libaa aa bi ki kpa mpɔɔn ke sin na.

¹⁴ Sin le ye Uwumbɔr u tun iwaan aatun na; aa mɔk ŋitimbol saapɔɔn sakpiin.

¹⁵ Aa di saapɔɔn gaa Jakob ni Josef aayaabitiib bi ye saanib na lii.

¹⁶ Uwumbɔr, nnyun aah kan si na, le ijawaan chuu mu, le nnyusakpem aataab deŋni,

¹⁷ le ntaalangbam bar nnyun kpir ni, le utaal nyan kitaapaak ki teen ni, le utaal moor ni kookoo lak lak.

¹⁸ Utaal aah tar pu na buen ni kookoo a, le utaal aah moor pu na cha dulnyaa mɔmɔk woln chain; le kitiŋ dam ki jii.

¹⁹ Aa chuun tinyunkpenn ni ki jer; aa lul nnyusakpem mu nyoo na ni ki puur, le ubaa aa kan saataabuu.

²⁰ Aa loln saanib pu nsan ke upihdaan na, ki cha Moses ni Aaronn joo bi.