Ilahn 76 - Uwumbɔr aagbaŋ

Uwumbɔr u nyaŋni na

¹ Juda aatiŋ yaab mɔmɔk nyi Uwumbɔr bɔr; Israel yaab nyuŋni waayimbil.

² Udo le ye Jerusalem; u koo Sionn Aajool paab la.

³ Nima chee le u kool waadim aapiin, u kool baajaak aapen ni njum; mbamɔn, u kool baajawan mɔmɔk.

⁴ Uwumbɔr, saapak nyaŋ sakpen a. Aa nan kpa nnaan aapɔɔn buyoonn aa nan nyan ni ŋijoo paab nin chee aa nyaŋ saadim na.

⁵ Baajab bi nan kaar na nan lann baawan mɔmɔk ki gur dɔ geen ntekpiigeen; baapɔɔn ni baalan mɔmɔk nan ye fam la.

⁶ Uwumbɔr u tiyaaja Jakob mu nan dii u na, saah nan faan bi buyoonn na, baataan ni binib bi dik i pu na nan lir ki kpoi.

⁷ Uwumbɔr, binib mɔmɔk san si ijawaan la. Buyoonn saaŋuul ti fii na kan, ubaa aan ki ŋmaa sil aanimbiin ni.

⁸ Aa bi paacham le ki cha binib mɔmɔk bee ke aa ga ji bi tibɔr le ijawaan nan chuu dulnyaa wee mɔmɔk,

⁹ n‑yoonn mu aa fii sil ke aa ji tibɔr ki gaa baah muk binib bi na lii na, le ni ŋmin chii.

¹⁰ Unibɔn aaŋuul moo joo ni kipak le nan tii si, binib bi ŋmar butɔb ni na ga li ji saajim.

¹¹ Tiin Uwumbɔr naah puu ke ni ga tii u pu na; ŋitimbol ŋi mɔmɔk bi ki duun na, li joo ni ipiin nan tii u man. Uwumbɔr cha unibɔn san u ijawaan;

¹² u sunn biyidam bi kpa kigaak na taab ki cha bibɔrkpaam san u ijawaan sakpen.