Ilahn 75 - Uwumbɔr aagbaŋ

Uwumbɔr le ye ubɔjir

¹ Uwumbɔr, ti dooni si, ti dooni si. Ti mooni saah kpa mpɔɔn sakpen pu na, ki tuk binib saah tun ŋitusakpiin ŋi na aabɔr.

² Uwumbɔr bui ke, “M siin n‑yoonn mu m ga ji binib tibɔr na, m ga di ibamɔn le ji bi tibɔr ngbaan.”

³ Tɔ, tiwanfuurkaan mɔmɔk aawon yaa gbaa, aan kitiŋ kibaa mu jii kan, m ga cha kaatinyik li pɔɔ kin kin.

⁴ M ga bui bibiindam ke bi taa li kpa kigaak;

⁵ M ga bui bi ke bi di cha kipupuk.

⁶ Libɔjil aa nyani liwipuul, kaa nyani liwilir, kaa nyani ŋŋangan, kaa nyani ŋŋangii wɔb;

⁷ Uwumbɔr le ji tibɔr, u bii bibaa aabɔr, le ki bui biken ke baabɔr ŋan.

⁸ Uwumbɔr joo kiyikuuk uŋaal ni, kiyikuuk ngbaan gbii ndapɔɔl mu ye waaŋuul na la. U bar mu, le bibiindam mɔmɔk nyun mu; bi nyun mu mɔmɔk pel pel.

⁹ Le mma ga li beenin len Uwumbɔr u Jakob mu nan dii u na aabɔr, ki ga li gaa ilahn ki pak u.

¹⁰ U ga wii bibiindam aapɔɔn, le ki tee moo kpee binib bi aabimbin ŋan na mpɔɔn.