Ilahn 74 - Uwumbɔr aagbaŋ

Limeel li ga gaa litimbol lii na

¹ Uwumbɔr, ba ŋa aa san cha mi kina? Aa gee aabaa aanib pu liŋuul li kaa kpa ndoon na la aa?

² Teer saanib bi aa nan lee bi n‑yoonn mu jer na pu, saanib bi aa nan nyan ni bi tinaagbiir ni ke bi nan li ye saanibol na. Teer Lijool Sionn, nin chee aa nan koo na bɔr.

³ Chuun baah ber ntim mu kookoo na pu; timi aadim bii doo tiwan ni mɔmɔk bi Saadichal ni na.

⁴ Saadim teen mpɔɔn pu Saadichal ni, baah kan linyaŋ pu na pu; bi di baatuutaa mam ŋum nima chee ke ni li ye limɔkl ki tii baanyaŋ ngbaan.

⁵ Bi naahn bijab bi gaar isui na la li ki joo baachɔm gaar isui lir.

⁶ Bi di baachɔm ni ligagaar fɔfɔk gbaa wiir baah di idɔ ŋa Saadichal aawan mɔmɔk ni na.

⁷ Bi wɔb Saadichal lii, le ki see li mmii; bi di tijɔŋ koo nin chee bi dooni si na.

⁸ Bi nan ban ke bi wɔi timi kookoo la; bi see nin chee mɔk bi chain kitiŋ kee pu na mmii.

⁹ Timi aawan nimɔk ye kitork aawan na buen a; saabɔnabtiib aa ki gur, le ubaa aa nyi nimina aah ga yunn ki ti saa pu na.

¹⁰ Uwumbɔr, timi aadim ga laa si ki saa bayoonn? Bi ga li seei si ki ti saa n‑yoonn mu kaa kpa ndoon na la aa?

¹¹ Ba ŋa aa yii kaa ter timi? Ba ŋa aa di aaŋaal bɔɔb aabaa ki si?

¹² Uwumbɔr, mpiin na, sin le nan ye timi aabɔr; n‑yoonn, n‑yoonn pam le aa gaa timi lii.

¹³ Aa di saapɔɔn sakpiin le di yakr nnyusakpem, le ki wii nnyusakpem ponn ni aapeewanbiik aayil,

¹⁴ aa wii nnyusakpem ponn ni aapɔɔndaan aayil, ki cha nteersakpiin ponn ni aapeel ŋman waawon.

¹⁵ Aa cha uyayak aanyunbun puu; aa cha ŋimɔɔ ŋi wiir na foor ki kuur.

¹⁶ Aa naan nwiin pu ni kinyeek; ki mɔk nwiin ni uŋmal naakakaa chee;

¹⁷ aa mɔk kitiŋ kaanaanmɔk; aa ŋa kitotoŋ ni tiwoor aayoonn.

¹⁸ Uwumbɔr, teer ke saadim laa si, li nyi ke baa dii si, le ki lik si fam.

¹⁹ Taa di saanib bi kaa kpa uteter na tii baadim bi ye bibiindam na; taa suln saanib bi bi ban bi ku bi na bɔr.

²⁰ Teer saah nan puu tipuur ti tii timi na bɔr. Mbimbin mu pɔɔ na bi kitiŋ kee pu ŋipepel mɔmɔk pu la.

²¹ Taa cha baah muk binib bi na ji inimɔɔn; cha bigiim ni binib bi kaa kpa na pak si.

²² Uwumbɔr, fii sil ki len saabɔr. Teer ke binib bi kaa dii si na laa si le nwiin ti lir.

²³ Taa suln saadim aaŋuul aajar ti bi ŋmɔ na bɔr, taa suln saadim aayoonn mɔmɔk aafuuk bɔr.