Ilahn 73 - Uwumbɔr aagbaŋ

Uwumbɔr aah kpa ibamɔn pu na

¹ Uwumbɔr sil kpa Israel yaab pu tiŋann, u kpa binib bi aasui ponn ni ŋan na pu tiŋann.

² Le ni tee gur siib ke maamakl u pu ga doo; maah tii u naadii u na gur siib u doo la.

³ Maah kan ke bibiindam aatuln mɔmɔk kpa tinyoor na, le m nan kpa bigaadam pu lipiipoln.

⁴ Baa ji iween aafalaa; bi pɔɔ le ki kpa laafee.

⁵ Baa ji falaa ke binib biken na; baa kani tibɔbir ti biken kani na.

⁶ Kina pu le bi di kigaak ŋa nneeleen ki di peen, ki di mbimbinpɔɔl ŋa tiwanpeenkaan;

⁷ tibɔbir le nyani bisui ni, le baalandak ye mbiin aalandak ŋmeen la.

⁸ Bi laa binib biken, le ki len tibɔbir; bi kpa kigaak, le ki kpokl ke bi muk biken.

⁹ Bi len Uwumbɔr u bi paacham na tibɔbir, le ki tii binib bi bi kitiŋ pu na kigaak aatun,

¹⁰ ki cha Uwumbɔr aanib fenn buen bi chee, ki ti kpaan kii baah len pu na mala.

¹¹ Bi len le ke, “Uwumbɔr aan li nyi; Mpɔɔndaan u bi paacham na aan bee.”

¹² Bibiindam bi kina la. Bi kpa sakpen, le ki moo kani n‑yoonn mɔmɔk.

¹³ Maah cha maabimbin ŋan aan maa tun titunwanbir na ye fam la aa?

¹⁴ Uwumbɔr, aa cha m jin falaa le nwiin ti lir; aa dar ntafal kichakpiik mɔmɔk ni.

¹⁵ M yaa len kina aabɔr kan, maa ba ga li tun ke saanib ponn ni ubaa na.

¹⁶ M pɔɔn mbaa ke m dakl lik tibɔr ngbaan ponn ni, le ti pɔɔ ti nyaŋ mi.

¹⁷ Le m ti baan di ti buen Saadichal ni. Nima chee le m bee tiwan ni ga ŋa bibiindam na.

¹⁸ Aa ga di bi siin nin chee ŋar na, ki cha bi lir ki kuln kookoo.

¹⁹ Libuul ngbaan ni le bi kuln, baah ga ti doo pu na ga li kpa ijawaan.

²⁰ Bi naahn tidaŋ ti aa daŋ kinyeek, ki woln kichakpiik ni ki suln ti na la; Uwumbɔr, aa yaa fii sil paacham kan, le bi wɔŋ.

²¹ Buyoonn maalandak nan bii nsui aan mmɔb ponn ni choŋ na,

²² m nan jɔr ke kiwakork na la; maa nan kee bee saabimbin.

²³ Tɔ, m mu nan beenin bi gbɔk si, le aa di aaŋaal chuu mi.

²⁴ Aa di saamɔkm le mɔk mi nsan, le nimina aadoon na, aa ga nan di kinyuŋ le gaa mi.

²⁵ M ki kpa ba paacham kaa ye sin? Maah kpa sin na, maa ki ban nibaa kitiŋ do.

²⁶ Nibaakan, maalandak ni nwon ga yɔl, le Uwumbɔr ma ye maapɔɔn; uma le ye tiwan ni m ban n‑yoonn mɔmɔk na.

²⁷ Binib bi yii si na ga sil kuln; aa ga doo binib bi nyan aapuwɔb na.

²⁸ Mma chee kan, ni ŋan ki ti nyaŋ ke m li duun Uwumbɔr; ni ŋan ti nyaŋ ke m kan Ndindaan Uwumbɔr chee nkiirm, ki moon waah ŋa pu na mɔmɔk.