Ilahn 72 - Uwumbɔr aagbaŋ

Nlan mu Ubɔr Solomonn nan naan mu na.

^1-2 Uwumbɔr, mɔk ubɔr aan u di ibamɔn ji binib tibɔr; yakr saabamɔn tii u, aan u di ibamɔn joo saanib, ki di tiŋann joo binib bi bi muk bi na.

³ Cha nwankam ni tiŋann li bi kitiŋ ngbaan pu;

⁴ Cha ubɔr ji bigiim aabɔr mbamɔm, ki ter binib bi kaa kpa na, ki nyaŋ binib bi muk bi na.

⁵ Cha saanib li dooni si ni ti yunn ke nwiin aah ga yunn pu na. Cha bi li dooni si ni ti yunn ke uŋmal aah ga yunn pu na, ki ti saa n‑yoonn mu kaa kpa ndoon na.

⁶ Cha ubɔr li bi ke utaal aah nu ikpaakon i pu na, ki naahn titaapupur aah pui kitiŋ pu pu na.

⁷ Cha tiŋann li bi waayoonn, ki cha nwankam li bi ki yunn ke uŋmal aah ga yunn pu na.

⁸ Waanaan ga taln ti saa ni mɔmɔk, ki nya Yufrates aamɔɔl ni ki ti saa kitiŋ aanaanmɔk.

⁹ Nteersakpiin pu aanib ga gbaan unimbiin ni; waadim ga tar lir kitiŋ, unimbiin ni.

¹⁰ Speenn aatiŋ, ni ŋidik pu aabɔrb ga tii u ipiin; Arabia ni Itiopia aatim aabɔrb ga joo ni ipiin.

¹¹ Bibɔrb mɔmɔk ga gbaan unimbiin ni; ŋitimbol mɔmɔk ga li dii uma la.

¹² Bigiim bi wii yin u na, u gaal bi lir, ki ter binib bi kaa kpa aan binib yii bi na.

¹³ U san bigiim ni binib bi kaa kpa mpɔɔn na kinimbaak; u gaal binib bi kaa kpa na aamɔfal lir.

¹⁴ U nyani bi ŋimuk ni mbimbin mu pɔɔ na ni; baamɔfal ye liwangol le u chee.

¹⁵ Uwumbɔr tii ubɔr limɔfal li fɔk na. Cha Arabia yaab tii u salmaa; cha bi mee limeel tii u n‑yoonn mɔmɔk; cha Uwumbɔr aanyoor li bi u pu n‑yoonn mɔmɔk.

¹⁶ Cha tijikaar li bi waatiŋ pu; cha tijikaar li bi ŋigongon pu, ke Lebanonn aagongon pu na. Cha binib li gbii ntim ponn ni, ke timoor aah gbii ikpaakon ni pu na.

¹⁷ Taa cha ubɔr aayimbil kuln; cha waayimbil yunn ke nwiin aah ga yunn pu na. Cha bi mee Uwumbɔr aan u ŋa tinyoor ŋa bi pu ke waah ŋa tinyoor ŋa ubɔr pu pu na.

¹⁸ Pak Uwumbɔr u ye timi Israel yaab Aadindaan na. Uma baanja le tun ŋitusakpiin ngbaan.

¹⁹ Li pak waayimbil li kpa kipak na n‑yoonn mɔmɔk man. Cha waapak gbii dulnyaa wee mɔmɔk. Amii, amii.

²⁰ Jese aajapɔɔn David aameel mɔmɔk le na.