Ilahn 71 - Uwumbɔr aagbaŋ

Ujaninkpel aameel

¹ Uwumbɔr, m dan aa chee ki ban nkiirm la, taa cha ubaa nyaŋ mi kpala.

² Saabimbinyaan pu, ter mi ki gaa mi lii. Pel m chee ki ter mi.

³ Li ye maakikiir u m mak u pu na, ki li bi ke kitiŋ ki bi maa ŋigon gob ki na, ki li kii mi; sin chee le m ga ŋmaa bɔr aan aa li kii mi.

⁴ Maawumbɔr, gaa mi bibiindam chee lii, nyan mi bibiindam ni titunwanbirdam aapɔɔn ni.

⁵ Uwumbɔr, sin pu le m kpa limakl; maah nan laa ye ubo pu na, le m nan di naadii tii si.

⁶ Sin pu le m nyii maamɔfal mɔmɔk ni; baah ma mi bundaal na, le aa piin ki kii mi. M ga pak si n‑yoonn mɔmɔk.

⁷ Maamɔfal ye limɔkl le ki tii binib pam; ba pu? sin le ye maakikiir u pɔɔ na.

⁸ M pak si ni nwiin aah ga ti lir pu na, ki mooni saapak aah bi pu na.

⁹ N‑yoonn mu m por na, taa yii mi; taa yii mi n‑yoonn mu maa ki kpa mpɔɔn na.

¹⁰ Maadim ban bi ku mi la; bi len le ki kpokl m pu.

¹¹ Bi len le ke, “Uwumbɔr siir cha u a; cha ti li dii u man ki ti chuu u, ubaa aa bi ki ga gaa u lii.”

¹² Uwumbɔr, taa li daa m chee; Maawumbɔr, ŋa mala ki nan ter mi.

¹³ Cha binib bi tak mi na lir ki kuln pel pel. Cha binib bi pɔɔni bibaa ke bi tii mi iween na ji inimɔɔn.

¹⁴ Sin pu le m ga li kpa limakl n‑yoonn mɔmɔk; m ga pak si, ki moo pak si.

¹⁵ M ga bui binib saah kpa tiŋann pu na; m ga li len saah gaal binib lir pu na ki ti saa nwiin aah ga lir pu na, tɔ, ni mu tee jer maah ga ŋmaa bee pu na.

¹⁶ Ndindaan Uwumbɔr, m ga pak saapɔɔn; m ga moon sin baanja aaŋann le pu.

¹⁷ Maah nan laa ye ubo pu na, le aa mɔk mi saatun, le m beenin len saatun sakpiin ŋi aa tun na.

¹⁸ Uwumbɔr, n‑yoonn mu m por aan n‑yil bi piir na, taa siir cha mi. Li bi m chee aan m moon saapɔɔn aah nyaŋ pu na tii n‑yoonn mu choo na aanib mɔmɔk.

¹⁹ Uwumbɔr, saabimbinyaan fuur kitaapaak, aa tun ŋitun ŋi nyaŋ na, ubaa aa bi ke si na.

²⁰ Aa cha tibɔbir ni falaa dan m pu, le aa ga ki giin ni maapɔɔn, saan cha m kpo.

²¹ Aa ga moo tii mi mpɔɔn ki jer njan na; aa ga ki sɔŋ nsui.

²² M ga sil di kibeek gaa ilahn ki pak si. Maawumbɔr, m ga pak si saaŋann sakpenn pu. M ga di maabeek tii sin u ye Israel yaab Aawumbɔr u bi chain na kipak.

²³ Buyoonn m bi gbaa kibeek pak si na, le m ga li tar mpopiin pu; saah gaa mi lii pu na, le m ga li pak si.

²⁴ M ga li len binib chee saah kpa tiŋann sakpen pu na, ki ti saa nwiin aah ga lir pu na; ba pu? binib bi pɔɔn bibaa ke bi tii mi titotonn na lir, le ki jin inimɔɔn.