Ilahn 70 - Uwumbɔr aagbaŋ

Limeel li ban nterm na

¹ Uwumbɔr, gaa mi lii, ter mi dandana wee.

² Cha binib bi ban ke bi ku mi na aalan ŋmal aan bi lir. Cha binib bi aasui piin maafalaa pu na di inimɔɔn gir bipuwɔb.

³ Cha binib bi laa mi na aataakpab yɔl aan bi lir.

⁴ Cha binib bi choo aa chee na li kpa mpopiin ni mmɔɔn. Cha binib bi dooni si saah gaa bi lii pu na li len n‑yoonn mɔmɔk ke, “Uwumbɔr aapɔɔn nyaŋ sakpen a.”

⁵ Nwon yɔl, le maa kpa nterm mubaa; Uwumbɔr, dan m chee dandana. Uwumbɔr, sin le ye u gaal mi lir na, san mala ki nan ter mi.