Ilahn 7 - Uwumbɔr aagbaŋ

Nlahn mu Ubɔr David nan gaa, Benjaminn aanii Kus aabiin pu na.

¹ Ndindaan Uwumbɔr, m dan aa chee ki ban nterm la; li kii mi ki gaa mi binib bi mɔmɔk san dii mi na chee lii,

² naa ye kina kan, bi ga chuu mi ke uchinn aah chur tiwan pu na, ki di buen nin chee ubaa aan ŋmaa gaa mi lii na, nima chee le bi ga ti daa par par mi.

^3-4 Ndindaan Uwumbɔr, m yaa tun ubaa taani, m yaa ti ki bii njɔ uken chee kan, bee m ŋa unii u kaa tun mi taani na mbiin, bee m yaa ti ki ŋa tiwan nimina nibaa kan,

⁵ kina kan, aa cha maadim li san dii mi ki chuu mi, cha bi chɔi chɔi mi ki ku mi, ki cha m kpo doon kitiŋ.

⁶ Uwumbɔr, di saaŋuul fii sil. Fii sil ki teŋ maadim aaŋuul; fiin aabaa paacham ki ter mi. Saah ban tiwan ni na le ye ibamɔn,

⁷ kina pu na, kuun binib mɔmɔk nan mann goln si, ki li bi paacham ki ye baajojoor.

⁸ Sin le ye unibɔn mɔmɔk aabɔjir. Uwumbɔr, len tibɔr kpee m pu; aa nyi ke maa tun taani ubaa.

⁹ Uwumbɔr, aa ye ubamɔndaan la, ki nyi tisui ponn ni aah bi pu na. Kuln kinimbɔŋdam aabiin; ki pa binib bi ŋan na baapar.

¹⁰ Uwumbɔr le ye maakikiir; u gaal binib bi mɔmɔk kii waamɔb na lir.

¹¹ Uwumbɔr ye ubɔjir u len ibamɔn na la, le ki bii bibiindam aabɔr.

¹² Bi yaa kaa kpeln baabimbin kan, Uwumbɔr luun waajaak aajuk. U pel waatɔm ki gor bu kiir;

¹³ u yoor waajawan ni bir na, ki di waapiin i gaal mmii na kaan bibiindam pu.

¹⁴ Lik bibiindam aah dakl tibɔbir pu na; bi kpokl tibɔbir, le ki ŋmanni biken.

¹⁵ Le baah pen biken gaawɔb mam bi na ki gir chur bima bibaa.

¹⁶ Kina pu na, bibaa aatunwanbir le dar bitafal, le baabimbin mu pɔɔ na mu tii bi titotonn.

¹⁷ M doon Uwumbɔr waabamɔn pu, m gaa ilahn ki pak Uwumbɔr Mpɔɔnsakpiindaan.