Ilahn 69 - Uwumbɔr aagbaŋ

Nterm aawiil

¹ Uwumbɔr, gaa mi lii. Nnyun ti saa nneen ni mɔk la;

² M bi chɔi tikpakpar ni, nin chee kitiŋ aa bi ntaal ga taa na la; M bi nnyun mu nyoo na ni la, le tinyunkpenn ban ti di mi muin.

³ Maah yin si pu ki ban nterm na le nneel ti waab, le nneen ni gur wu. Maah lik pu ki ban saaterm na, le nnimbil aa ti ki waa.

⁴ Binib bi nan mi fam na wiir jer tiyikpir ti bi n‑yil pu na, Maadim mɔni inyamɔn le paani mi, bi kpa mpɔɔn le ki ban bi ku mi. Bi cha m joo tiwan ni maa sun na le giini tii.

⁵ Uwumbɔr, aa waa maatunwanbir; aa nyi maah tun kijɔrk aatuln pu na.

⁶ Ndindaan Uwumbɔr Mpɔɔnsakpiindaan, taa cha m joo ni inimɔɔn nan tii binib bi gaa si kii na. Israel yaab Aawumbɔr, taa cha m joo ni inimɔɔn nan tii binib bi dooni si na.

⁷ Sin pu le bi seei mi, le m gur ye unimɔɔnii.

⁸ M gur naahn uchaan le ndo yaab chee, ki naahn uwɔwɔnja nna aabim chee.

⁹ Maah neen saadichal pu na bi ke mmii le aah wu mponn ni na; ŋisiibil ŋi ye sin yee na choo min chee la.

¹⁰ M sunn mbaa taab ki lulni bumɔb, le binib seei mi;

¹¹ m pee ŋikpokeken, le bi laa mi.

¹² Bi kaa kitiŋ ponn ni le ki len mi, le bidanyurb naani mi ilahn.

¹³ Uwumbɔr, le m ma ga mee si; Uwumbɔr, kii mi buyoonn aa gee na. Saageehm sakpiin pu, kii maayim, ba pu? aa joo saapuur ti aa puu ke aa ga gaa binib lii na.

¹⁴ Nyan mi maah bi chɔi tikpakpar ti ponn ni na; gaa mi maadim chee lii, nyan mi nnyun nyonyoon mue ni.

¹⁵ Taa cha nwam ngbaan biin m pu; taa cha m sunn buen nnyun nyonyoon ni, ki taa cha m sunn buen likaakul ni.

¹⁶ Uwumbɔr, saageehm mu bi n‑yoonn mɔmɔk na pu, ŋun maayim; di saah san kinimbaak sakpen pu na fenn lik mi.

¹⁷ Taa di aabaa bɔr saatutunn, m bi tibɔr sakpenn ni la, kii maayim dandana.

¹⁸ Dan ki nan gaa mi lii; nyan mi maadim chee.

¹⁹ Aa nyi baah seei mi pu na, ki nyi baah jinni mi inimɔɔn ki bii mi pu na, aa nyi maadim mɔmɔk.

²⁰ Ŋisiibil le bii nsui, le ntaakpab yɔl. M nan mak ke ubaa ga san mi kinimbaak, le ubaa aa gar, m nan mak ke ubaa ga nan sɔŋ nsui, le kaa kan ubaa,

²¹ Nkon aah nan chuu mi buyoonn na, le bi di njinn ŋa maajikaar ni; nnyunyuu aah chuu mi buyoonn na, le bi di tiwanyukaan ni mɔɔn na tii mi.

²² Cha baajikaar aajim kpaln baadoon; cha baawaatork kpaln baalirm.

²³ Cha ijoon chuu bi mɔmɔk, cha bipuwɔb taa li pɔɔ.

²⁴ Cha saaŋuul lir bi pu; cha saaŋuusakpeln nyaŋ bi.

²⁵ Cha baakookoo yaan kpaln tilangbenn, taa cha ubaa gur baadichal ni.

²⁶ Bi ŋani saah daa binib bi aatafal na mbiin; le ki joo saah tii binib bi titotonn na aafalaa mooni.

²⁷ Ŋmee baatunwanbir mɔmɔk bil, taa cha bi kan saaŋmarm siib kina.

²⁸ Ber baayimbil limɔfal aagbaŋ ni; taa cha bi kpaan saanib ni.

²⁹ Tɔ, iween ni itaakpayɔl le joo mi; Uwumbɔr, fiin mi siin ki gaa mi lii.

³⁰ M ga di nlahn le pak Uwumbɔr; m ga di idoon le moon waah kpa mpɔɔn pu na.

³¹ Nimina le ga mɔɔr Uwumbɔr ki jer inaa aatork, ki jer unaaja u filk na aatork.

³² Binib bi bi limukl ni na yaa kan kina kan, bisui ga piir; le binib bi dooni Uwumbɔr na aataakpab ga pɔɔk.

³³ Uwumbɔr ŋun binib bi kaa kpa na aayim, kaa suln waanib bi bi kiyondiik ni na aabɔr.

³⁴ Paacham ni kitiŋ, pak Uwumbɔr man, nnyusakpem ni tiwanfuurkaan nimɔk bi mu ni na mu pak u.

³⁵ U ga gaa Jerusalem lii ki gir maa Juda aatim. Waanib le ga li koo nima ki li yeh kitiŋ ngbaan;

³⁶ le waatutunn aayaabitiib nan ji kaafaal, le binib bi gee u na li koo nima.