Ilahn 68 - Uwumbɔr aagbaŋ

Litimbol aanyaŋ aalahn

¹ Uwumbɔr fii sil ki cha waadim yaa tɔb chee. Binib bi kaa gee u na lir le ki san.

² Libuln aah daar iŋmanyuu cha pu na, kina le u jenni bi cha; nsiigban aah donni mmii chee pu na, kina le bibiindam kulni Uwumbɔr aanimbiin ni.

³ Le bininyaam ma kpa mpopiin ki mɔɔni unimbiin ni, bi kpa mpopiin le ki tar mmɔɔn pu.

⁴ Gaa ilahn tii Uwumbɔr man, gaa ilahn ki pak waayimbil man; toor nsan tii Uwumbɔr u chuun ntaalangbam pu na man. Waayimbil le ye Uwumbɔr, cha nisui li piin unimbiin ni man.

⁵ Uwumbɔr u bi waadichal li bi chain na ponn ni na lik nkpobim, le ki kii bikpopiib.

⁶ U tii binib bi kaa kpa ubaa na nkookoo yaan, le ki nyani biyom kooni mpopiin aafuur ni, le binib bi yii waamɔb na ma ga li bi kitiŋ ki kaa kpa nibaa na ponn ni.

⁷ Uwumbɔr, saah nan cheen saanib buyoonn, ki nan di bi bɔ dii nteersakpiin ni na,

⁸ kitiŋ nan dam, le utaal nyan ni kitaapaak ki lir ni, ba pu? Uwumbɔr u nan len Sainai Aajool pu na le nan choo, Israel yaab Aawumbɔr le nan choo.

⁹ Aa nan cha utaasakpiin nun, le saatiŋ ki nan sar na ki gir,

¹⁰ le saanib maa baadichal nima chee; saaŋann sakpenn pu le aa tii bigiim baah ban pu na.

¹¹ Uwumbɔr tii nsan, le bipiib pam moon tibɔr ngbaan ke,

¹² “Bibɔrb ni baajab san la.” Bipiib bi nan bi linampal na yakr bijab aah jan ki gaa tiwan ni na.

¹³ Nima le ye baah di tikunabr naan ŋinanjel ŋi, aan ki di salmaa boon ŋifeen na. (Ba nan ŋa aan nimi bibaa gaal ipiih aabɔkpur ponn ni butɔb daal?)

¹⁴ Uwumbɔr Mpɔɔnsakpiindaan aah nan yaa bibɔrb Salmonn Aajool pu na, u nan cha ŋitaanal lir nima chee.

¹⁵ Basann aajool ye lijool sakpeln la, lijool li kpa ŋijoomɔju sakpen na.

¹⁶ Ba ŋa aa bi saajoomɔju sakpiin ngbaan paab ki lik seen lijool li Uwumbɔr lee ke u li bi nima na? Uwumbɔr ga li bi nima chee n‑yoonn mɔmɔk.

¹⁷ Uwumbɔr ga di waataan aatɔroku mam ŋichur ŋichur bi kpa mpɔɔn na nyan ni Sainai aajool ki nan koo ni nin chee bi chain na.

¹⁸ U joo binaagbiib pam ki chaa paacham; u gaal ipiin binib bi yii waamɔb na chee. Tidindaan Uwumbɔr le ga li bi nima.

¹⁹ Pak Uwumbɔr man, u tu timi aatun iwiin mɔmɔk na; uma le ye Uwumbɔr u gaal timi lir na.

²⁰ Timi Aawumbɔr le ye Uwumbɔr u gaal binib lir na; uma le ye Tidindaan Uwumbɔr u nyani timi nkun ni na.

²¹ Uwumbɔr ga sil wii waadim aayil, u ga wii binib bi tun titunwanbir n‑yoonn mɔmɔk na aayil.

²² Uwumbɔr bui ke, “M ga giin ni nimi aadim ki nya ni Basann; M ga giin nyan ni bi nnyusakpem aataab,

²³ aan ni lul baasin ponn ni ki jer, aan nimi aabɔ ga ŋmaa lakr yaa gee pu na.”

²⁴ Uwumbɔr, binib mɔmɔk kan saanyaŋ aasachuln, bi kan Uwumbɔr, u ye maabɔr na, aasachuln li u di koo waadichal ponn ni na.

²⁵ Bilahngaab le loln nsan, le biwangbaab paa puwɔb, le bisapɔm bi gbaa ŋidabun na bi kaasisik ni.

²⁶ “Pak Uwumbɔr, waanib aakuun ni man; Nimi bimɔk ye Jakob aayaabitiib na, pak Uwumbɔr man.”

²⁷ Njan, Benjaminn aanibol li par sakpen na le loln nsan, le Juda aayidam ni baanib paan bi pu, le Sebulunn ni Naftali aayidam paan.

²⁸ Uwumbɔr, mɔk saapɔɔn, mɔk saapɔɔn mu aa di tun timi pu,

²⁹ ki nyan Saadichal li bi Jerusalem ponn ni, nin chee bibɔrb joo ni si baapiin na.

³⁰ Kae kipeewanbiik Ijipt u bi likal ni na; kae ŋitimbol ŋi ye inaaja ni yaanaabi na, ki ti saa buyoonn bi mɔmɔk ga nan gbaan ki tii si tikunabr aapiin na. Yaa binib bi gee butɔb na.

³¹ Bininkpiib ga nya ni Ijipt ki dan; Kus yaab ga yoor biŋaal paacham ki mee Uwumbɔr.

³² Dulnyaa wee ni aanaan, gaa ilahn tii Uwumbɔr man, gaa ilahn ki pak uma Uwumbɔr

³³ u chuun n‑yaayoonn na aataapaak ni na. Li pel man waah tar mpɔɔn pu pu na.

³⁴ Moon Uwumbɔr aah kpa mpɔɔn pu na; waanaan aapɔɔn le joo Israel yaab, waapɔɔn bi kitaapaak ni.

³⁵ Uwumbɔr aah nyan waadichal ni ki choo pu na kpa ijawaan la. Uma le ye Israel yaab Aawumbɔr. U tii waanib mpɔɔn ni tiwon aapɔɔn. Pak Uwumbɔr man.