Ilahn 67 - Uwumbɔr aagbaŋ

Idoon aalahn

¹ Uwumbɔr, san timi kinimbaak ki ŋa saanyoor ŋa ti pu,

² aan dulnyaa wee mɔmɔk li nyi saah gee timi pu na, aan ŋitimbol mɔmɔk kan saaŋmarm.

³ Uwumbɔr, cha binib pak si; cha binib mɔmɔk pak si.

⁴ Cha ŋitimbol li kpa mpopiin ki gaa mpopiin aalahn; ba pu? aa joo ibamɔn le ji binib tibɔr, le ki mɔk litimbol mɔmɔk kitiŋ kee pu saasan.

⁵ Uwumbɔr, cha binib pak si; cha binib mɔmɔk pak si.

⁶ Kitiŋ nyan kaajikaar; Uwumbɔr, timi Aawumbɔr ŋa waanyoor ŋa ti pu.

⁷ Uwumbɔr ŋa waanyoor ŋa ti pu; Cha binib bi bi ni kookoo na nyuŋ u.