Ilahn 66 - Uwumbɔr aagbaŋ

Kipak ni idoon aalahn

¹ Binib mɔmɔk, di mpopiin pak Uwumbɔr mpɔɔn pu man.

² Gaa ilahn ki nyuŋ waayimbil, ki tii u kinyuŋ aapak.

³ Bui Uwumbɔr ke, “Saah ŋa tiwan ni na nyaŋ a. Saapɔɔn nyaŋ, le saadim san ijawaan ki gbaani aanimbiin ni.

⁴ Unii umɔk bi kitiŋ kee pu na dooni si la; bi gaa ilahn ki pak si; bi gaa ilahn ki pak saayimbil.”

⁵ Dan ki nan lik man Uwumbɔr aah ŋa waatusakpeln li binib ponn ni na.

⁶ U cha nnyusakpem kpaln kitikuun; tiyaajatiib chuun bitaa pu le ki puur limɔɔl. Nima chee le ti nan mɔɔni waah tun pu na pu.

⁷ U joo waapɔɔn lik binib pu ki cha n‑yoonn mu kaa kpa ndoon na, ki cha unimbil paa ŋitimbol mɔmɔk pu. Taa cha ubaa nya upuwɔb.

⁸ Ŋitimbol mɔmɔk, pak timi Aawumbɔr man; cha unii mɔmɔk ŋun nimi aapak pu.

⁹ Uma le cha ti kpa limɔfal kaa cha ti lir.

¹⁰ Uwumbɔr, aa tɔŋ timi; baah pu tikunabr mmii ni pu ki nyani tijɔŋ na, kina le aa tɔŋ timi.

¹¹ Aa cha ti lir gaawɔb mam ponn ni ki di ŋitun ŋi nyuun na paan ti pu.

¹² Aa cha timi aadim taa taa ti pu; ti chuun mmii ni nwam ponn ni, le dandana ma aa joo ni timi nan kaan lifuur ponn ni.

¹³ M ga joo ni kitork ki bi ga di see mmii ni na saadichal ni, m ga tii si maah puu pu na.

¹⁴ Maah nan bi tibɔr ni ki bui ke m ga tii si pu na, m ga tii si ni.

¹⁵ M ga tii ipiih aan bi di see mmii ni, kitork aabimbiln paab; m ga toor inaaja ni iŋoob aatork, le yaaŋmanyuu fii buen kitaapaak.

¹⁶ Binib bi mɔmɔk nyuŋ Uwumbɔr na, dan ki nan pel man, aan m bui nimi waah tun pu tii mi na.

¹⁷ M nan wii ki ban nterm u chee; m di ilahn pak u.

¹⁸ M yaa nan ba di maatunwanbir bɔr nsui ni kan, Uwumbɔr aa ba ga pel m chee.

¹⁹ Tɔ, Uwumbɔr tee pel m chee; u pel maameel.

²⁰ M pak Uwumbɔr, ba pu? waa yii maameel, kaa munn mi waageehm mu bi n‑yoonn mɔmɔk na.