Ilahn 65 - Uwumbɔr aagbaŋ

Kipak ni idoon

¹ Uwumbɔr, ni ŋan ke ti pak si Sionn aatiŋ ni, ki li joo taah puu tipuur ti tii si na,

² ba pu? aa keei limeel mɔmɔk.

³ Binib ga nya ni kookoo ki dan aa chee, baatunwanbir pu. Timi aataani nyaŋ timi la, le aa ma joo cha pinni timi aataani.

⁴ Saah lee binib bi ke bi li koo saadichal ni na kpa mpopiin. Tiwanyaan ni bi saadichal ponn ni, ki ye Lidichal ngbaan aanyoor na ga tii timi mpopiin.

⁵ Saah tii timi linyaŋ li na le ye ke aa keei timi aayim, le ki tun lijinjiir aawan ki gaal timi lir. Dulnyaa wee mɔmɔk ni aanib, ni binib bi bi nnyusakpem aapuwɔb na tii si naadii.

⁶ Saapɔɔn pu le aa di ŋijoo siin ŋaabuu ni, ki mɔk saapɔɔn sakpiin.

⁷ Aa cha nnyusakpem ŋmini chii; ki cha mu aanyunkpenn ŋmini chii; binib yaa faa kifuuk kan, le aa ŋmin bi chii.

⁸ Saah tun ŋitun sakpiin ŋi na cha dulnyaa mɔmɔk san si la. Saabimbin joo ni mpopiin, le ki nyan ni kitiŋ kee mɔmɔk pu.

⁹ Saah gee kitiŋ pu na, le aa cha utaal nu; aa cha ki nyuun le ki kpa tijikaar. Aa cha nnyun gbiini ikpen; aa tii kitiŋ tijikaar. Saah ŋani ni pu na sɔ:

¹⁰ Aa cha utaal nu ikpaakon i bi toor bil na ponn ni pam, le i sɔŋ mbamɔm. Aa cha titaapupur sɔŋni kitiŋ, ki cha tijikaar ti laa punn na muuni.

¹¹ Saaŋann tii tinyoor sakpen a. Aa yaa buen nimɔk na kan, nkam le bi.

¹² Kimopɔɔk mɔmɔk ni ye tiwakor ŋmeen la; le ŋigongon mɔmɔk pu ye mpopiin ŋmeen.

¹³ Ipiih le gbii nkpaatan aatiŋ ni; tifatann mɔmɔk ni ye njikaabim la. Tiwan mɔmɔk tar le ki gaa mpopiin aalahn.