Ilahn 64 - Uwumbɔr aagbaŋ

Limeel li ban nkiirm na

¹ Uwumbɔr, m bi tibɔr ni la, ŋun maameel. M san maadim ijawaan la, gaa maamɔfal lii.

² Li kiir mi aan bibiindam aah gor kiir mi pu na taa pii mi, nyan mi titunwanbirdam bi wiir na ni.

³ Bi luuni baalambil ŋi ka ke kijaak aajum na la, le ki len tibɔbir ti tok kaa yenni ke ipiin na.

⁴ Bi mooni baanyamɔn kaa san inimɔɔn kpala; bi joo inyamɔn le kulni bininyaam.

⁵ Bi pɔɔni tɔb aataakpab, baalandak i kaa ŋan na ponn ni, bi kpokl nin chee bi ga pen baagaawɔb mam na la. Bi len le ke, “Ubaa aan kan timi.”

⁶ Bi kpokl ilandak i kaa ŋan na, le ki bui ke, “Ti kpokl titunwanbir aalandak i ŋan sakpen a.” Saan ŋmaa bee unibɔn aasui, ni waalandak aatataa.

⁷ Le Uwumbɔr too bi waapiin, libuul ngbaan ni le bi kani titotonn.

⁸ Baamɔbon ngbaan pu le u ga kuln bi; le binib bimɔk kan bi na ga gbɔk biyil.

⁹ Bi mɔmɔk ga san ijawaan; bi ga li dak Uwumbɔr aah tun pu na le ki tuk binib waabimbin aah bi pu na.

¹⁰ Binib bimɔk aabimbin ŋan na ga li mɔɔni Uwumbɔr aah ŋa pu na pu. Bi ga kan u chee ŋŋmarm; bininyaam mɔmɔk ga pak u.