Ilahn 63 - Uwumbɔr aagbaŋ

Ubɔr David nan naan nlahn mue buyoonn u nan bi Judea aateersakpiin ni na.

¹ Uwumbɔr, sin le ye Maawumbɔr, le m neen si. Nsui, ni nwon mɔmɔk ban si ke kitiŋ ki kuur, ki laa itiween, kaa kpa nnyun na aah ban nnyun pu na la.

² Cha m kan si saadichal ni, cha m kan saah kpa mpɔɔn, ni kipak pu na.

³ Saageehm mu bi n‑yoonn mɔmɔk na ŋan jer limɔfal, kina pu le m ga pak si.

⁴ Maah bi limɔfal ponn ni n‑yoonn mumɔk na, le m ga li dooni si, m ga yoor ŋŋaal paacham ki li mee si.

⁵ M ga bab ke maah jin tijikaar ti ŋan sakpen na le na, le m ga gaa mpopiin aalahn ki pak si.

⁶ M yaa dɔ tiwandookaan pu kan, m teer aabɔr la; kinyeek mɔmɔk kan, m dak sin pu la;

⁷ ba pu? sin le ter mi n‑yoonn mɔmɔk. Aaŋmaŋ taab le m ga gaa mpopiin aalahn.

⁸ M bub joo si la, le aaŋaal tii mi ŋŋmarm.

⁹ Binib bi ban ke bi ku mi na ga sunn buen kitekpiitiŋ ni.

¹⁰ Butɔb ponn ni le bi ga ku bi, le takɔ mam ŋmɔ biwon.

¹¹ Uwumbɔr aah tii ubɔr linyaŋ pu na, le u ga li mɔɔni. Binib bi puur tipuur Uwumbɔr aayimbil pu na ga pak u, le binyamɔndam ma aamɔi ga ŋmin.