Ilahn 62 - Uwumbɔr aagbaŋ

Li mak Uwumbɔr aakiirm ni

¹ M jin limɔr le ki kii Uwumbɔr ke u gaa mi lii; uma baanja pu le m ga ŋmaa nyii ki sil.

² Uma baanja le kii ki gaal mi lir; uma le kii mi, le ubaa aan ŋmaa nyaŋ mi.

³ Ni mɔmɔk ga li tak unii, ni ti yunn kinye? unii u bi ke ligoln li taa taa iween na.

⁴ Ni ban ke ni nyan u waah bi nin chee ki kpa kipak na, le ki jinn u inimɔɔn; ni geei inyamɔn le ni mɔ nimi. Ni len tinyoor aabɔlen la, le nisui ponn ni ma kan, ni puuni lir u pu.

⁵ Uwumbɔr baanja pu le m nyii ki bi; m kpa u pu limakl.

⁶ Uma baanja le kii mi, ki gaal mi lir; uma le kii mi, le ubaa aan ŋmaa nyaŋ mi.

⁷ Maaŋmarm ni maapak bi Uwumbɔr chee la; u pɔɔ le ki ye u kii mi na; u ye maabɔbɔryaan la.

⁸ Maanib, tii Uwumbɔr naadii n‑yoonn mɔmɔk man. Bui u nimi aamuk mɔmɔk man, ba pu? uma le ye timi aabɔbɔryaan.

⁹ Unibɔn naahn litakpiln libaa aabuln la; binikpaam ni biwaatiib mɔmɔk aa kpa tinyoor. Di bi tɔŋ likakl pu, le aa ga bee ke baa nyuun kpala, libuln nyuun jer bi.

¹⁰ Taa tii mbimbinpɔɔl naadii; taa li mak ke nnaayupɔɔn ga tii si tinyoor tibaa; hali saawangol yaa moo kpae kan, taa li ka nyiibaa li pu.

¹¹ M ŋun ni jer nfum mubaa Uwumbɔr len ke mpɔɔn ye uyaan la,

¹² ki ki len ke waageehm bi n‑yoonn mɔmɔk. Uwumbɔr, si aabaa le pa unii waatuln aah ŋeer pu na.