Ilahn 60 - Uwumbɔr aagbaŋ

Ubɔr David nan to Siria yaab bi nyan ni Naharaim ni Soba aatim ni na butɔb, le waajab aaninkpel Joab gir ki nan ku Edom aatiŋ aajab ŋichur kipiik ni ŋilee, n‑yaan aafataŋ ni. N‑yoonn ngbaan le David naan nlahn ngbaan, ke u mɔk waanib.

¹ Uwumbɔr, aa yii timi, le ki nyaŋ timi; aa nan gee liŋuul ti pu, dandana ma kan, gir gaa timi.

² Aa cha kitiŋ jii, le ki cha ki gii ki taa nween; dandana ma kan, toor ki, ba pu? ki bi lir la.

³ Aa cha saanib jin falaa sakpen a. Ti chuun gbeer ke taah nyun ndaan le na.

⁴ Aa sak binib bi san si na, aan baadim taa nyaŋ bi.

⁵ Ŋun timi aameel, di saapɔɔn gaa timi lii, aan saah gee binib bi na ŋmar.

⁶ Uwumbɔr bi waadichal li bi chain na ni ki len ke, “M ga di linyaŋ yakr Sekem aatiŋ ki yakr Sukof aafataŋ tii maanib.

⁷ Gilead ni Manase aatim ye min yaan la; Efraim aatiŋ le ye maakur aayikpupuk, le Juda ye maabɔr aajaangbeek.

⁸ Moab aatiŋ le ga li ye maasapeek. M ga di maanaatak di mee paan Edom pu, ki mɔk ke ki ye mbaa aatiŋ la. M nyaŋ Filistia aatiŋ le ki teen mpɔɔn pu.”

⁹ Uwumbɔr, ŋmaa ga di mi buen kitiŋ ki bi maa ŋigon gob ki na ponn ni? Ŋma ga cheen mi Edom aatiŋ ponn ni?

¹⁰ Aa sil yii timi la aa? Saan ki dii timi aajab buen butɔb ni ii?

¹¹ Ter timi, timi aadim chee; unibɔn aaterm aa ye nibaa.

¹² Uwumbɔr yaa bi ti chee kan, ti ga nyaŋ, u ga nyaŋ timi aadim.