Ilahn 6 - Uwumbɔr aagbaŋ

Limukl aayoonn aameel

¹ Uwumbɔr, taa gee m pu liŋuul ki kae mi. Taa daa ntafal saaŋuul ponn ni.

² Uwumbɔr, nwon mɔmɔk kpo a, san mi kinimbaak. M bak sakpen a; pɔɔk ntaakpab,

³ m bi limukl ponn ni la. Uwumbɔr, aa ga yunn kinye aan ki nan nin ter mi?

⁴ Uwumbɔr, dan nan gaa mi lii; di saanimbaak nyan mi nkun ni.

⁵ Ubaa aa teer aabɔr kitekpiitiŋ ni; ubaa aan ŋmaa pak si nima.

⁶ Mpombiin cha nwon mɔmɔk kpo a; maah wii kinyeek mɔmɔk pu na cha maawandookaan sɔŋ a, tinyunyunn sɔŋ maayikukur a.

⁷ Maadim aah cha m wii pu na duun duun nnimbil a, le maa ki waa mbamɔm.

⁸ Nimi kinimbɔŋdam, siir m chee man, Uwumbɔr ŋun maah wii pu na;

⁹ u pel maah wii ban nterm pu na, ki ga kii maameel.

¹⁰ Maadim ga bee nlirm aanimɔɔn aah wu pu na; libuul ngbaan ni le bilan ga ŋmal, le bi jenn yaa bi.