Ilahn 59 - Uwumbɔr aagbaŋ

Ubɔr Sɔɔl nan tun bijab bibaa, ke bi ti li kii David aadichal, aan bi ku u, le David naan nlahn mue.

¹ Maawumbɔr, gaa mi maadim chee lii; li kii mi aan binib bi tak mi na taa pii mi.

² Gaa mi titunwanbirdam chee lii; Chuu gaa mi binikurb chee lii.

³ Uwumbɔr, lik baah dɔ kii mi pu ke bi ku mi na; bibiindam le bi kuuni ki ban mi. Naa ye ke m tun titunwanbir, bee taani ubaa la,

⁴ kaa ki ye maataani pu le bi san ban bi tak mi.

⁵ Ndindaan Uwumbɔr Mpɔɔnsakpiindaan, fii sil ki nan ter mi; Israel yaab Aawumbɔr, si aabaa waa. Fii sil ki daa binib bi kaa dii saasan na aatafal. Taa san titunwanbirdam bi fii sil aa pu na kinimbaak.

⁶ Kijook kan, le bi gir ni, ki san gbii ŋinyin ke ibɔ na kitiŋ ponn ni.

⁷ Li pel baah seei ki faani pu na. Baanyin bi ke kijaak aajum na le bimɔi ni, le ki dak ke ubaa aa pel bi chee la.

⁸ Uwumbɔr, le sin ma laa bi; aa ŋani binib bi kaa dii saasan na mbɔnyun la.

⁹ M kpa limakl saapɔɔn pu; Uwumbɔr, sin le ye maabɔbɔryaan.

¹⁰ Maawumbɔr gee mi, ki ga nan ter mi; u ga cha m kan maadim aah ga lir pu na.

¹¹ Uwumbɔr, taa ku bi ki cha maanib suln baatafadaan bɔr. Uwumbɔr u kii timi na, di saapɔɔn yaa bi ki nyaŋ bi.

¹² Tibɔbir bi bimɔi ni, le baamɔbon mɔmɔk ye tibɔbir la; cha baagaak di bi koon tibɔr ni, Baah puuni ki geei inyamɔn pu na,

¹³ kuln bi pel pel saaŋuul ponn ni. Kina kan, unii mɔmɔk ga bee ke Uwumbɔr le joo Israel aanib, ki joo unii mɔmɔk kitiŋ kee pu.

¹⁴ Kijook le maadim gir ni, ki san gbii ŋinyin ke ibɔ na kitiŋ ponn ni;

¹⁵ bi san kpak ke ibɔ i chuu kpak ban tijikaar na la, i yaa kaa jin bab kan, le i ŋuuni.

¹⁶ Le mma ga gaa ilahn ki mɔk saah pɔɔ pu na; saageehm mu bi n‑yoonn mɔmɔk na pu, m ga gaa ilahn mpɔɔn pu kichakpiik mɔmɔk ni. Aa chee le m bɔrni, linimaln aayoonn kan, aa chee le m bɔrni.

¹⁷ Maakikiir, m ga pak si. Maabɔbɔryaan le ye Uwumbɔr, Uwumbɔr u gee mi na.