Ilahn 58 - Uwumbɔr aagbaŋ

Limeel li ban ke Uwumbɔr daa bibiindam aatafal na

¹ Nimi bibɔjirb, ni kee jin tibɔr ibamɔn ni ii? Ni ji binib mɔmɔk aabɔr mbamɔm aa?

² Aayii. Ni dak titunwanbir ti ni ga ŋmaa ŋa na pu baanja la, le ki tun mpɔɔn aatunwanbir kitiŋ kee pu.

³ Titunwanbirdam tun tiwan ni kaa ŋan na le baamɔfal aayoonn mɔmɔk; bundaal bi ma bi na le bi piin ki geei inyamɔn.

⁴ Bi kpa liluul ke iwaa na la, le ki ŋeeb bitafal

⁵ ke saapa u kaan ŋun binib bi ŋmanni iwaa ki chur i na aaneel na, ni kina aanib bi kpa nlan na aaneel.

⁶ Uwumbɔr, kool ichinnbir ngbaan aanyin.

⁷ Cha bi wɔŋ ke nnyun mu bi foor na; cha bi yɔl ke timoor ti dɔ nsan ni na.

⁸ Cha bi li bi ke naawor mam bi bunn ki kpaln kijɔŋjɔŋ na. Cha bi taa kan nwiin ke ubo u kpo una aaponn ni ki nyan ni na.

⁹ Bi ga per bi ke timoor na, aan bi nin bee; Uwumbɔr aaŋuusakpeln ponn ni le u pii bi libuln buen aan bi beenin fu.

¹⁰ Uwumbɔr yaa daa mbiindam aatafal kan, le ni piir binib bi aabimbin ŋan na aasui, le bi ga lul bibiindam aasin ponn ni ki jer.

¹¹ Le binib ga bui ke, “Uwumbɔr sil pa binib bi aabimbin ŋan na tipar;” ki ki len ke, “Uwumbɔr u ji dulnyaa yaab tibɔr na sil bi.”