Ilahn 57 - Uwumbɔr aagbaŋ

David nan naan nlahn mue buyoonn u nan san nyan Ubɔr Sɔɔl chee ki koo kitakpaluŋ ni na.

¹ San mi kinimbaak, Uwumbɔr, san mi kinimbaak; ba pu? m dan aa chee ki ban ŋŋmarm la. Saafeen ponn ni le m kani lifuur ki ti saa buyoonn ŋimuk sakpiin ga ti jer doo na.

² M yin Uwumbɔr u kpa mpɔɔn jer mpɔɔn mɔmɔk na. M yin Uwumbɔr u tii mi maah ban tiwan nimɔk na.

³ U ga li bi paacham le ki kii maayim ki gaa mi lii; u ga nyaŋ binib bi muk mi na. Uwumbɔr ga mɔk mi waageehm mu bi n‑yoonn mɔmɔk na ki ga ŋa waah puu ke u ga ŋa pu na.

⁴ Maadim mann gonn mi la, bi naahn ichinn i ŋmɔ binib na la. Baanyin naahn tikpaatunn ni ipiin la; le baalambil bi ke kijaak aajum mu ka na.

⁵ Uwumbɔr, mɔk saah pɔɔ sakpen pu na kitaapaak ni, ki mɔk saapak kitiŋ kee mɔmɔk pu.

⁶ Maadim di kipɔɔk le pen mi ke ki chuu mi; ntaakpayɔl le nyaŋ mi. Bi gbii libuul bil maasan ni, le ki labr lir li ponn ni bibaa.

⁷ Uwumbɔr, m kpa limakl, m ga gaa ilahn ki pak si.

⁸ M ga fii sil, m ga moo pel maabar, m ga gaa ilahn lichakpitaawoln.

⁹ Uwumbɔr, m ga doon si ŋitimbol ni; m ga pak si binib ni.

¹⁰ Saageehm mu bi n‑yoonn mɔmɔk na fuur paacham; le saaŋann taln ti fuu kitaapaak.

¹¹ Uwumbɔr, mɔk saah pɔɔ sakpen pu na kitaapaak ni, ki mɔk saapak kitiŋ kee mɔmɔk pu.