Ilahn 56 - Uwumbɔr aagbaŋ

Buyoonn Filistia yaab nan chuu David na, u naan nlahn mue la.

¹ Uwumbɔr, san mi kinimbaak, ba pu? binib ban mi ni linimaln la; maadim muk mi n‑yoonn mɔmɔk la.

² Maadim tak mi kina le nwiin ti lir. Binib bi tak mi na wiir sakpen a.

³ Uwumbɔr Mpɔɔnsakpiindaan, buyoonn ijawaan ti joo mi na le m kpa aa pu gaakii.

⁴ M kpa Uwumbɔr pu gaakii le kaa san ijawaan; m pak u waah puu tipuur ti na pu. Unibɔn aan ŋmaa ŋa mi nibaa.

⁵ Maadim ban tibɔr tii mi kina le nwiin ti lir; n‑yoonn mɔmɔk kan, bi ban isan le ke bi tii mi titotonn.

⁶ Bi kuuni tɔb le ki bɔrni ki lik maah ŋani tiwan ni mɔmɔk na, ki mak ke bi ku mi.

⁷ Uwumbɔr, daa bitafal, baatunwanbir pu, nyaŋ binib ngbaan buyoonn saaŋuul fii na.

⁸ Aa nyi naah muk mi pu na; aa nyi maanyunyunn aakahm, aa ŋmee ti ŋa saagbaŋ ni.

⁹ Bundaal m ti yin si na kan, maadim ga fenn bipuwɔb. M nyi ke Uwumbɔr bi m chee.

¹⁰ M pak waah puu tipuur ti na,

¹¹ m kpa uma pu le gaakii, kaan li san ijawaan, unibɔn aan ŋmaa ŋa mi nibaa.

¹² Uwumbɔr, maah puu ke m ga tii si pu na, m ga ŋa kina; m ga tii si maadoon aapiin;

¹³ ba pu? sin le nyan mi nkun ni, kaa cha maadim nyaŋ mi. Kina pu na, m bi Uwumbɔr aanimbiin ni, nwiihn mu wiin binib bi kpa limɔfal na ni la.