Ilahn 55 - Uwumbɔr aagbaŋ

Uja aajɔ aah bii u aan u mee limeel li na

¹ Uwumbɔr, ŋun maameel, taa fenn aapuwɔb tii maah gaŋni si pu na.

² Pel m chee ki kii maayim; maamuk cha nwon yɔl la.

³ Ijawaan joo mi maadim aah faani mi pu na la, bibiindam aamuk ku mi a. Bi joo ni mi tibɔr la; baaŋuul fii m pu, le bi nan mi.

⁴ Ijawaan le joo mi, le nkun aajawaan ku mi.

⁵ Ijawaan chuu mi, le nwon jii, ijawaan nyaŋ mi a.

⁶ M yaa ba kpa ifeen ke linanjel na, m ba ga fii buen dandar, ki ti ban lifuur nima chee.

⁷ M ba ga fii buen dandar, ki ti maa maadichal nteersakpiin pu.

⁸ M ba ga ŋa mala ki kan nin chee m ga di n‑yil peŋ na, aan libupɔɔl ni kitaabuŋ taa pii mi.

⁹ Uwumbɔr, cha maadim aalan ŋmal aan bi taa ŋmaa len. M waa tijar, ni kifuuk, kitiŋ ngbaan ni;

¹⁰ ni mann goln ki, nwiin pu ni kinyeek, ki joo ni titunwanbir ni tibɔr.

¹¹ Libiil le bi ni kookoo, limukl ni ŋŋmann le gbii ki ponn ni.

¹² Ni yaa ba ye ke maadin le laa mi kan, m ba ga ŋmaa joo ti; ni yaa ba ye ke unii u kpak mi na le bi kpa kipupuk kan, m ba ga ŋmaa di mbaa bɔr.

¹³ Le ni tee ye sin njɔ la, m ni u diir tɔb na, ki ye njɔ bamɔnn na.

¹⁴ M ni uma nan gbaa tibaa aabɔr, ki kpaani ki dooni Uwumbɔr waadichal ni.

¹⁵ Cha maadim kpo aan baayoonn taa kee fuu; cha bi laa li fu ki sunn buen kitekpiitiŋ ni. Tibir bi bido, ni bisui ni la.

¹⁶ Le m yin Tidindaan Uwumbɔr ke u ter mi, le u ga gaa mi lii.

¹⁷ Maamuk ni maadun chaa u chee kichakpiik ni, ni nwiin pu, ni kinyeek, le u ga ŋun maaneel pu.

¹⁸ U ga giin ni mi butɔb bumɔk m ni maadim bi maa nyi bi mɔk na jaa na ni.

¹⁹ Uwumbɔr u joo binib ki nyan dulnyaa aah piin buyoonn na ga ŋun m pu ki nyaŋ bi, ba pu? bi yii, kaa kpeln baabimbin, kaa san u mu.

²⁰ Maajan aajɔ le tak ujɔtiib, u bii waah puu tipuur ti na a.

²¹ Waamɔbon nan mɔ ke tisiir na, le uponn ni ma tee to; waamɔbon nan sɔŋni unii aasui ke nkpapem na, le ki tee geei ke kijaak aajuk ki ka na.

²² Di saamuk di tii Uwumbɔr, le u ga kiir si, waan cha bi nyaŋ binib bi aabimbin ŋan na.

²³ Uwumbɔr, sin ma ga joo ni binikurb, ni binyamɔndam ngbaan baakaakul ni aan baamɔfal ligeln nin doo. Mma kan, m ga di naadii tii sin la.