Ilahn 53 - Uwumbɔr aagbaŋ

Unibɔn aabiin aah bi pu na

¹ Bijɔrb le bui bibaa ke, “Uwumbɔr aa bi.” Bi mɔmɔk ye beebeedam la, le ki tun ŋitun ŋi kaa ŋan na; ubaa aa bi ki tun lituln li ŋan na.

² Uwumbɔr bi paacham le ki lik ni unibɔn pu taab, ke u lik ke bibaa bi ki kpa nlan ki dii u aan baa bi.

³ Le bi mɔmɔk fenn bipuwɔb tii u, bi mɔmɔk aa ŋan. Ubaa aa bi ki tun lituln li ŋan na, ubaa baanja aa bi.

⁴ Le Uwumbɔr baa ke, “Baa nyi la aa? Titunwanbirdam bee aa nyi la aa? Bi su maanib kinaayuk le ki ji, le kaa dooni mi kpala.”

⁵ Tɔ, ijawaan mu tee ga chuu bi, ke yaah kaa kee chuu bi pu na; ba pu? Uwumbɔr ga di waanib aadim aakpab yaa. Uwumbɔr yii bi, kina pu le Israel yaab ga nyaŋ bi kookoo.

⁶ M mee Uwumbɔr ke linyaŋ ga nya ni Sionn ki dan Israel yaab chee. Uwumbɔr yaa tii Israel yaab nkam kan, bi ga li kpa mpopiin sakpen.