Ilahn 52 - Uwumbɔr aagbaŋ

Edom aaja Doeg nan tuk Ubɔr Sɔɔl ke David ni Ahimelek kpokl ban u, nee aapuwɔb le David naan nlahn mue.

¹ Unikpaan, ba ŋa aa kpa kipupuk saatunwanbir pu? Uwumbɔr aageehm aa kpa ndoon.

² Aa ban isan ke aa kuln biken; saalambil ka ke kijukaŋ na la. N‑yoonn mɔmɔk kan, aa naani inyamɔn la.

³ Aa gee titunwanbir ki jer litunyaan, ki gee inyamɔn jer mbamɔn.

⁴ Sin unyamɔndaan, aa gee ke aa li joo saamɔbon bii biken aasui.

⁵ Kina pu le Uwumbɔr ga kuln si, u ga yoor si ki nya saadichal ni. U ga nyan si binib bi kpa limɔfal dulnyaa wee na ni.

⁶ Binib bi aabimbin ŋan na ga kan kina, le ijawaan ga chuu bi; le bi ga laa si ki bui ke,

⁷ “Lik, uja u kaa nan di Uwumbɔr yin nibaa na sɔ, u nan lik waawangol pu la, ki dak ke mbiin le ga tii u lifuur ki gaa u lii.”

⁸ Le mma bi ke olif aakpan aasub bu si Uwumbɔr Aadichal ni na; m kpa waageehm mu bi n‑yoonn mɔmɔk na pu limakl.

⁹ Uwumbɔr, m ga li dooni si n‑yoonn mɔmɔk saah ŋa pu tii mi na pu. Saanib aanimbil ni le m ga len ke aa ŋan.