Ilahn 51 - Uwumbɔr aagbaŋ

Ubɔr David nan yoor Uria aapuu Batseba ki doon u chee, le Uwumbɔr aabɔnabr Natann mɔk u waataani. Nee aapuwɔb le David naan nlahn mue.

¹ Uwumbɔr, san mi kinimbaak, saageehm mu bi n‑yoonn mɔmɔk na pu. Saanimbaasaln sakpeln pu, finn nyan maatunwanbir.

² Finn nyan maabɔbir mɔmɔk ki cha m nyan maatunwanbir ni chain.

³ M bee maataani mɔmɔk, n‑yoonn mɔmɔk kan, m nyi maatunwanbir bɔr.

⁴ M tun si titunwanbir, sin baanja le m tun titunwanbir, ki ŋani tiwan ni ye aa chee tibir na, kina pu na, aa yaa jin mi tibɔr kan, ni ŋan, aa kpa mbamɔn ke aa bui ke maabɔr bii.

⁵ N‑yoonn mu bi ma mi na, le m kpa titunwanbir, ki nyan nwiin mundaal bi ma mi na, le m ye titunwanbirdaan.

⁶ Saah ban pu na le ye mbimbinyaan, ni ibamɔn; di saalan gbiin mi.

⁷ Nyan mi maatunwanbir ni, aan m nya chain; finn mi, aan m piir chain ke tikokonn na.

⁸ Cha mpopiin ni mmɔɔn gbiin mi, le saah kool mi doo pu na nsui ga ki piir.

⁹ Taa cha aanimbil kan maatunwanbir, ki finn nyan maabɔbir mɔmɔk.

¹⁰ Uwumbɔr, naan nsui mu ŋan na tii mi, ki di nsuupɔɔn mu ga kii saamɔb na tii mi.

¹¹ Taa jenn mi aanimbiin ni kookoo; taa chuu nyan Saafuur Nyaan m chee.

¹² Gaa mi lii, aan m ki kan mpopiin, ki cha m li ye unii u keei saamɔb na,

¹³ le m ga mɔk titunwanbirdam saakaal aan bi fenn gir ni aa chee.

¹⁴ Uwumbɔr, taa junn maamɔfal. Nya mi tibɔbir ni, aan m di mpopiin moon saah kpa mbimbinyaan pu na.

¹⁵ Uwumbɔr, ter mi aan m ŋmaa len ki pak si.

¹⁶ Aa yaa ba ban kitork kan, m ba ga toor kitork tii si; saa neen kitork ki bi joo seer mmii ni tii si na.

¹⁷ Uwumbɔr, saatork ki aa gee na le ye nsui mu sunn mubaa taab ki ŋmaa kpiir mu aatunwanbir na.

¹⁸ Uwumbɔr, san Sionn aanib kinimbaak ki ter bi, ki gir maa Jerusalem aagon.

¹⁹ N‑yoonn ngbaan le aasui ga piir kitork baamɔŋ, ni timi aatork ki ti joo seer mmii ni tii si na pu, le bi ga kɔr inaaja toor kitork saatork aabimbiln paab.