Ilahn 50 - Uwumbɔr aagbaŋ

Saah ga li dooni Uwumbɔr mbamɔm pu na

¹ Tidindaan Uwumbɔr Mpɔɔnsakpiindaan le len na; u yin kitiŋ kee pu yaab mɔmɔk ki nyan liwipuul ki ti saa liwilir wɔb.

² Uwumbɔr wiin Sionn aatiŋ ki ŋan sakpen na ni.

³ Timi Aawumbɔr choo, le kifuuk dii u; mmii mu gaal mpɔɔn pu na le loln u pu nsan, le libuln li pɔɔ sakpen na mann goln u.

⁴ U yin paacham, ni taab, ke ni nan li ye seeraadam ki kan waah ga ji waanib tibɔr pu na.

⁵ U bui ke, “Kuun ni maanib bi kpa gaakii ki di kitork puu tipuur tii mi na tii ni mi.”

⁶ Paacham len ke Uwumbɔr aabimbin ŋan, ke uma le ye ubɔjir.

⁷ “Maanib, li pel man, aan m len tibɔr, M ga kpiir sin Israel yaab pu. Min le ye Uwumbɔr, m ye nimi Aawumbɔr la.

⁸ Maa galni nimi kitork ni nimi aatork ki ni joo seer mmii ni tii mi n‑yoonn mɔmɔk na pu la,

⁹ ki mu aa ban nimi aasar ponn ni aanaaja, ni iŋoob nimi aaŋoob ni;

¹⁰ tiwakor timɔk bi kichook ni na ye min yaan la, le inaa imɔk bi ŋigongon ŋichur ŋichur pu na mu ye min yaan.

¹¹ Min le yeh inyoon imɔk bi timoor ni na, ni tiwan nimɔk fu ki bi tikpaasar ni na.

¹² Nkon yaa ba joo mi kan, maa ba ga tuk nimi, ba pu? dulnyaa wee mɔmɔk, ni nimɔk bi u ni na ye min yaan la.

¹³ M ŋmɔ inaaja aanann la aa? M nyu iŋoob aasin la aa?

¹⁴ Cha man idoon baanja li ye kitork ki ni joo tii mi na, ki tii mi Uwumbɔr Mpɔɔnsakpiindaan tiwan nimɔk ni puu ke ni ga tii mi na.

¹⁵ Tibɔr yaa dan kan, ni yin mi le m ga gaa nimi lii aan ni ga pak mi.”

¹⁶ Le Uwumbɔr bui bibiindam ma ke, “Ba ŋa ni cha maakaal bi nimɔb ni? Ba ŋa ni len maah puu tipuur ti na aabɔr?

¹⁷ Ni yii, ke m taa mɔk nimi buyoonn ni yenn na; ni yii maamɔbon.

¹⁸ Ni yaa kan unaayuk umɔk na kan, le ni kpaan kpaln ujɔtiib, le ki mu diir bidagoob.

¹⁹ N‑yoonn mɔmɔk kan, ni gor ki ban ke ni len tibɔbir la; le ki mɔni inyamɔn n‑yoonn mɔmɔk.

²⁰ Ni gor n‑yoonn mɔmɔk ke ni galn nina aabim la, ki ban ke ni kan baataani.

²¹ Ni ŋani nimina mɔmɔk, le maa len tibaa, kina pu le ni dakl ke m mu bi kina la. Tɔ, dandana ma kan, m ban m galn nimi la, ki nyan tibɔr ngbaan lipaal tii nimi.

²² Nimi bi yii mi na, li pel man tibɔr tee, naa ye kina kan, m ga ku doo nimi, le ubaa aan li bi ki ga gaa nimi lii.

²³ Idoon le ye kitork ki ga nyuŋ mi na, le m ga sil gaa binib bimɔk kii maamɔb na lii.”