Ilahn 48 - Uwumbɔr aagbaŋ

Uwumbɔr aatiŋ Sionn

¹ Uwumbɔr aapɔɔn nyaŋ sakpen, ni ŋan ke ti li pak u mbamɔm, waagongoln li bi chain na paab.

² Uwumbɔr aajool Sionn fɔk paacham, le ki ŋan; Ubɔrkpaan ngbaan aatiŋ joo ni mpopiin le nan tii dulnyaa mɔmɔk.

³ Uwumbɔr mɔk ke lifuur bi u chee, waatiŋ ki bi maa ŋigon kiir ki na ponn ni.

⁴ Bibɔrb nan kuun tɔb ki dan ke bi nan tak Sionn Aajool.

⁵ Tɔ, baah nan kan li na, le ni ŋa bi iwaan; ijawaan nan chuu bi, le bi san.

⁶ Ijawaan ni falaa sakpiin le nan chuu bi nima chee, ke upii u ban u maa ubo na,

⁷ ki naahn buŋɔb aah yeŋni kitaabuŋ ni pu na.

⁸ Ti ŋun Uwumbɔr aah tun pu na, le dandana ma kan, tinimbil kani waatun, waatiŋ ni. Uma le ye Uwumbɔr Mpɔɔnsakpiindaan; u ga cha lifuur li bi kitiŋ ngbaan ni, ki ti saa n‑yoonn mu kaa kpa ndoon na.

⁹ Uwumbɔr, Saadichal ponn ni le ti dakl saageehm mu bi n‑yoonn mɔmɔk na pu.

¹⁰ Binib bi bi ni mɔmɔk na pak si la, le saayimbil yaa ki buen kitiŋ kee aapepel mɔmɔk ni. Ibamɔn pu le aa joo saanib;

¹¹ Cha Sionn aanib li kpa mpopiin. Aa ji tibɔr ni ibamɔn la; cha mpopiin li bi Juda aatim pu.

¹² Uwumbɔr aanib, chuun mann Sionn aatiŋ man, ki kahn kaadifɔfɔŋ ngbaan;

¹³ moo lik man kaagon ŋi bi maa gob ki na, ni tidir ti kpa mpɔɔn na mbamɔm, aan ki nan bui binib bi paa ni puwɔb na ke,

¹⁴ “Uwumbɔr umina ye timi Aawumbɔr le ki ti saa n‑yoonn mu kaa kpa ndoon na.” Uma le ga mɔk timi nsan ki ti saa n‑yoonn mu kaa kpa ndoon na.