Ilahn 46 - Uwumbɔr aagbaŋ

Uwumbɔr bi ti chee

¹ Uwumbɔr le ye timi aakikiir, ni timi aapɔɔn, tibɔr aayoonn mɔmɔk kan, u gor le ki ter timi.

² Kina pu na, taan san ijawaan, hali kitiŋ yaa dam aan ŋijoo ber lir nnyusakpem aataab kan, taan san ijawaan;

³ hali nnyusakpem yaa fii ti lir aan ŋigongon dam kina pu kan, taan san ijawaan.

⁴ Limɔɔl libaa le bi, ki joo ni mpopiin nan tii Uwumbɔr u kaa kpa ŋeen aatɔ na aatiŋ ki ponn ni waadichal bi na.

⁵ Uwumbɔr bi kitiŋ ngbaan ni, kina pu na, kaan bii daalbaadaal; lichakpitaawoln le u ga dan nan ter ki.

⁶ Ijawaan chur ŋitimbol, le nnaan mɔmɔk jii; Uwumbɔr tar, le kitiŋ bunn doo.

⁷ Uwumbɔr Mpɔɔnsakpiindaan bi ti chee; uma u nan ye Jakob Aawumbɔr na le ye timi aabɔbɔryaan.

⁸ Dan nan lik man Uwumbɔr aah ŋa tiwan ni na. Lik man waah ŋa lijinjiir aawan ni kitiŋ pu na.

⁹ U cha butɔb door dulnyaa wee mɔmɔk ni; U kool itɔi, ki bii tikpaatunn, ki seer kijaak aapen mmii.

¹⁰ U len ke, “Di cha kijaak man, ki bee ke min le ye Uwumbɔr, m ye ŋitimbol mɔmɔk aayidaan, ni dulnyaa mɔmɔk aayidaan.”

¹¹ Uwumbɔr Mpɔɔnsakpiindaan bi ti chee; uma u nan ye Jakob Aawumbɔr na le ye timi aabɔbɔryaan.