Ilahn 45 - Uwumbɔr aagbaŋ

Ubɔr aabɔndinn aalahn

¹ Ŋimɔbonyaan le gbii nsui ni, le m naan nlahn mue m tii ubɔr. Nlambil gor ke li di nlahn lii ke ugbaŋmeer nyaan aagbaŋmeemoon aah ga ŋmee pu na.

² Sin ubɔr le ŋan jer bijab mɔmɔk; aa ye unii u ŋmaa len na la. Uwumbɔr ŋani tinyoor ŋani aa pu n‑yoonn mɔmɔk la.

³ Ubɔr sakpiin, di saajaak aajuk peen; aa kpa mpɔɔn ni kipak.

⁴ Di mpɔɔn buen ki ti kan mbamɔn ni mbimbinyaan aanyaŋ. Saapɔɔn le ga cha aa kan linyaŋ sakpeln.

⁵ Saapiin ka pam, i too chaar saadim aapobil, le ŋitimbol lir gbaani aanimbiin ni.

⁶ Nnaan mu Uwumbɔr di tii si na ga li bi ki ti saa n‑yoonn mu kaa kpa ndoon na. Aa joo saanib mbamɔm la;

⁷ aa gee lituln li ŋan na, le ki nan titunwanbir. Kina pu le Uwumbɔr u ye Saawumbɔr na lee si ki tii si mpopiin ki jer bibɔrb biken.

⁸ Tulalee tiib bi bi yin bi ke mir ni alos na le gbii saakeken pu; le bilahngaab ni biwangbaab bi ŋibɔrchin ŋi bi di iluub aanyin di toor ŋi na ponn ni ki pak si.

⁹ Bibɔrb aabisatiib ŋmal bipiib bi bi saachiln ni na, le ubɔrpii si libɔrjal chee aaŋangii wɔb, ki pee salmaa nyaan aaleen.

¹⁰ Ubɔr aabɔndinn, li pel maah len pu na, suln saanib, ni aado yaab bɔr.

¹¹ Saanyaan le ga cha ubɔr li gee si; uma le ye saaninkpel, kina pu na, kii waamɔb.

¹² Taya aatiŋ aanib ga joo ni si ipiin, biwankpadam ga dan nan ban ke bi piir aasui.

¹³ Ubɔr aabɔndinn u mu ye ubɔr aabisal na koo ni ki ŋan sakpen a. Bi di salmaa aakokonn le luu waabɔkul.

¹⁴ U pee waabɔkul li ŋmal ŋitanyaan na, le bi di u buen ubɔr chee, le unaakoontiib dii u, le bi mu ti fuu ubɔr ngbaan chee.

¹⁵ Bi di mpopiin ni mmɔɔn le ti koo libɔrchiln ni.

¹⁶ Sin maabɔr, m ga tii si japɔtiib pam, le bi nan gaa aayaajatiib aanaan, le aa ga ŋa bi kitiŋ kee mɔmɔk aajojoob.

¹⁷ Maalahn le ga cha saayimbil li bi ki ti saa n‑yoonn mu kaa kpa ndoon na, le binib mɔmɔk ga li pak si n‑yoonn mɔmɔk.