Ilahn 44 - Uwumbɔr aagbaŋ

Limeel li ban nterm na

¹ Uwumbɔr, tiyaajatiib bui timi, le titafal ŋun saah nan tun ŋitukpaan ŋi baayoonn mu jer ki yunn na.

² Sin aabaa le nan jenn nyan binib bi kaa dii si na, ki di saanib kaan baatiŋ pu. Aa nan daa binib ngbaan aatafal ki cha saanib kan tinyoor.

³ Saanib aa nan di baajaak aajum le nyaŋ ki gaa kitiŋ ngbaan; baa nan di bibaa aapɔɔn le di kan linyaŋ ngbaan; ni nan ye sin aapɔɔn pu la; saah nan bi bi chee pu na le nan cha bi nyaŋ, le ki mɔk ke aa gee bi.

⁴ Sin le ye Maawumbɔr ni maabɔr; aa tii saanib linyaŋ,

⁵ le ti joo saapɔɔn nyaŋni timi aadim.

⁶ Maa mak maatɔm pu, kaa mak maajaak aajuk pu ke ni gaa mi lii;

⁷ le sin ma gaa timi, timi aadim aaŋaal ni lii, le ki nyaŋ binib bi kaa gee timi na.

⁸ Ti ga pak si n‑yoonn mɔmɔk, ki li dooni si ki ti saa n‑yoonn mu kaa kpa ndoon na.

⁹ Le dandana wee aa yii timi ki cha bi nyaŋ timi. Saa ki diir timi aajab chaa butɔb ni.

¹⁰ Aa cha timi aadim jenn timi, le ki yoor timi aawangol.

¹¹ Aa cha bi kɔr timi ke ipiih na la, aa cha ti yaa koo ntiyayam ni.

¹² Aa di saanib kooh kidaak ki kaa pɔɔ na kaa kan tinyoor tibaa.

¹³ Timi ni binib bi koo gbɔk tɔb na kani saah ŋani timi pu na, le bi ŋani timi mbɔnyun ki laa timi.

¹⁴ Aa di timi ŋa yaansara aawan le ŋitimbol ŋiken chee; bi laa timi le ki gbakr biyil.

¹⁵ N‑yoonn mɔmɔk kan, m bi inimɔɔn ni la;

¹⁶ maah ŋun maadim ni binib bi nan mi na aasiibil ni tilaar pu na m ye unimɔɔnii la.

¹⁷ Nimina mɔmɔk ŋa timi n‑yoonn mu taa suln aabɔr kaa bii tipuukpaan ti aa nan puu tii timi na.

¹⁸ Taa nyan aapuwɔb, taa yii saamɔbon.

¹⁹ Le aa siir cha timi tipeewanbir aakaasisik ni; aa siir cha timi mbɔmbɔɔn sakpen ponn ni la.

²⁰ Ti yaa ba di cha kaa ki dooni si, timi Aawumbɔr, ki mee liwaal libaa kan,

²¹ aa ba ga bee, ba pu? aa nyi tisui aah bi pu na.

²² Tɔ, sin pu le bi ku timi iwiin mɔmɔk, le ti naahn ipiih i bi ban bi ti kɔr i na la.

²³ Uwumbɔr, finn ngeen pu. Ba ŋa aa dɔ geen? Fii sil paacham. Taa yii timi kookoo.

²⁴ Ba ŋa aa joo aabaa bɔrni timi? Taa suln timi aafalaa ni timi aamuk bɔr.

²⁵ Ti lir wɔb ki dɔ kitiŋ la; ti lir ki dɔ titan ponn ni la.

²⁶ Dan nan ter timi. Gaa timi lii, saageehm mu bi n‑yoonn mɔmɔk na pu.