Ilahn 42 - Uwumbɔr aagbaŋ

Unii u kaa bi waatiŋ ni na aameel

¹ Uwumbɔr, upeeman aah ban mbun mu aanyun soon na pu na, kina le m mu ban si.

² Sin Uwumbɔr u bi n‑yoonn mɔmɔk na, m wii ban si la; bayoonn aan m ga ŋmaa buen aanimbiin ni ki ti doon si?

³ M wii nwiin pu ni kinyeek la, le maanyunyunn ye maajikaar; n‑yoonn mɔmɔk kan, maadim baa mi le ke, “Saawumbɔr ngbaan bi la?”

⁴ M yaa teer n‑yoonn mu jer na aabɔr kan, le nsui bii, n‑yoonn ngbaan le m nan dii kinipaak buen Uwumbɔr do ki loln bi pu nsan na, kinipaak ngbaan aasui nan piin, le bi gaa ilahn ki tar ki pak Uwumbɔr.

⁵ Ba ŋa nsui aa piin? Ba ŋa nsui bii kina? M mak Uwumbɔr pu la, le m ga ki pak u, uma le ye Maawumbɔr u gaal mi lir na.

^6-7 Maah bi tinaagbiir aatiŋ ni na, nsui bii la, kina pu le m di maalandak ŋa u ni. U di mpombiin aanyunkpenn le biin nsui pu, nlanŋmal ŋmeen le choo m chee ke nwam na, ki naahn nnyun mu nya ni Hemonn, ni Misar Aajoo paab ki puu lir ni Jɔɔdann aamɔɔl ni na.

⁸ Uwumbɔr tii mi waageehm mu bi n‑yoonn mɔmɔk na nwiin pu, aan m nan li kpa limeel aalahn kinyeek ki gaa mee Uwumbɔr u tii mi limɔfal na.

⁹ M len Uwumbɔr u ye maakikiir na chee ke, “Ba ŋa aa suln mbɔr? Ba ŋa m beenin ji falaa, maadim aah ŋa mi mbiin pu na pu?”

¹⁰ Baasiibil le doo mi. Bi baa mi n‑yoonn mɔmɔk ke, “Saawumbɔr ngbaan bi la?”

¹¹ Ba ŋa nsui aa piin? Ba ŋa nsui bii kina? M mak Uwumbɔr pu la, le m ga ki pak u, uma le ye Maawumbɔr u gaal mi lir na.