Ilahn 41 - Uwumbɔr aagbaŋ

Ubun aameel

¹ Binib bi aatafal bi bigiim wɔb na, bima le kpa mpopiin; Uwumbɔr ga ter bi buyoonn bi bi tibɔr ni na.

² Uwumbɔr ga li kii bi le ki bɔr baamɔfal mbamɔm. U ga cha bi li kpa mpopiin kitiŋ kee pu; waan cha baadim aapɔɔn pii bi.

³ Bi yaa bun kan, Uwumbɔr ga ter bi ki cha bi pɔɔk.

⁴ M len ke, “Uwumbɔr, m tun si titunwanbir; san mi kinimbaak ki tii mi laafee.”

⁵ Maadim len mi tibɔr ti kaa ŋan na. Bi ban ke m kpo aan binib suln m bɔr la.

⁶ Binib bi choo nan manni mi na ye binyamɔndam la; bi chuun ban maabɔbir la, le ki di buen ni kookoo ki ti len ti.

⁷ Binib bimɔk kaa gee mi na looni tuk tɔb maabɔr la, bi dakl lik maabɔr ti kaa ŋan kpala na la.

⁸ Bi len le ke, “Waabunbunn ngbaan nyaŋ u a; waan ki fii daalbaadaal.”

⁹ Hali njɔnyaan, u m tii u naadii sakpen na, aan m ni u kpaan ni ji lisambil libaa ni na, uma le fii sil m pu.

¹⁰ Uwumbɔr, san mi kinimbaak, ki tii mi laafee, aan m teen maadim.

¹¹ Baan nyaŋ mi, le m ga bee ke aasui piin m pu.

¹² Aa ga ter mi, ba pu? m ŋani ni ŋan na la; aa ga cha m li bi aanimbiin ni n‑yoonn mɔmɔk.

¹³ Pak timi Israel yaab Aadindaan Uwumbɔr man. Li pak u man dandana, ni n‑yoonn mu kaa kpa ndoon na. Amii amii.