Ilahn 40 - Uwumbɔr aagbaŋ

Kipak aalahn

¹ M nan ka suuna le ki kii Uwumbɔr aaterm; le u pel m chee ki ŋun maawiil.

² U daa nyan mi mbuu mu bir na ni, u nyan mi tikpakpar ti nyoo na ponn ni, ki di mi kaan litakpal li paa na pu, le nibaa aan ki pii mi nima.

³ U nan mɔk mi nlahnpɔɔn ke m gaa, nlahn mu m ga gaa pak uma Uwumbɔr na. Binib bi kan kina na pam ga li san u, ki di naadii tii u.

⁴ Binib bi di naadii tii Uwumbɔr, kaa dii ŋiwaa, kaa kpaani binib bi dii ŋiwaa na chee na, bima le kpa mpopiin sakpen.

⁵ Tidindaan Uwumbɔr, aa ŋa tiwan pam tii timi; ubaa aa bi ke sin na. Aa dak ke aa ga ŋa iwaan aatun tii timi, maa nan ŋmaa len ŋi mɔmɔk pu, ŋaakahm wiir sakpen a.

⁶ Saa ban tiwakor ni tijikaar aatork; saa ban ke m di tiwakor toor kitork ki di see mmii kitork aabimbiln paab tii si, kaa ban ke m toor kitork titunwanbir pu, aa tee tii mi ŋitafal ke m ŋun tii si,

⁷ kina pu le m gar ke, “M sɔ. Saah ban ke m li ŋani pu na bi Nkaal Aagbaŋ ponn ni la.

⁸ Maawumbɔr, m gee sakpen ke m ŋa saageehn, m joo saamɔkm nsui ni la.”

⁹ Uwumbɔr, saanib mɔmɔk aakuun ni, le m len tibɔnyaan ke aa gaa timi lii. Aa nyi ke m ga li len ti, kaan di cha.

¹⁰ Maa di tibɔnyaan ngbaan di bɔr, n‑yoonn mɔmɔk kan, m len saah ŋan sakpen ki ter mi pu na la. Maan li si ŋmin saanib mɔmɔk aakuun ni, m ga len saageehm mu bi n‑yoonn mɔmɔk na, ni saah si chob pu na aabɔr.

¹¹ Uwumbɔr, m nyi ke saan di cha kaan san mi kinimbaak. Saageehm, ni saah si chob pu na le ga li kii mi n‑yoonn mɔmɔk.

Limeel li ban nterm na

¹² Tibɔr pam le mann goln mi, tibɔbir ti maan ŋmaa kahn ti na. Maatunwanbir chuu mi a, le maa ki waa; ti wiir jer n‑yil paab aayikpir, le ntaakpab yɔl.

¹³ Uwumbɔr, gaa mi lii. Ter mi dandana wee.

¹⁴ Cha binib bi ban ke bi ku mi na aalan ŋmal aan bi lir kookoo. Cha binib bi aasui piir maah bi tibɔr ni pu na di inimɔɔn labr.

¹⁵ Cha binib bi laa mi na kan nsuubiin baalirm pu.

¹⁶ Cha binib bimɔk choo aa chee na kan mpopiin ni mmɔɔn. Cha binib bimɔk dooni si saah gaa bi lii pu na len n‑yoonn mɔmɔk ke, “Uwumbɔr aapɔɔn nyaŋ a.”

¹⁷ Uwumbɔr, nwon yɔl, le m ye ugiin, le saa suln mbɔr. Sin le ye Maawumbɔr u gaal mi lir na, ŋa mala ki nan ter mi.