Ilahn 4 - Uwumbɔr aagbaŋ

Ubɔr David aah mee Uwumbɔr kijook pu na

¹ Maawumbɔr, maakikiir, m yaa mee si kan, kii mi. Maah nan bi limukl ni na, aa nan ter mi. San mi kinimbaak dandana wee, ki pel maameel.

² Nimi binib bimina, ni ga seei mi ki ti saa bayoonn? Ni ga li gee tiwan ni kaa kpa tinyoor tibaa na, ki chuun dii inyamɔn aawan ki ti saa bayoonn?

³ Teer man ke Uwumbɔr le lee bininyaam ke bi li ye waanib, le m yaa yin u ki ban nterm kan, u ŋun maayim ngbaan.

⁴ Di cha titunwanbir, ki li jii ijawaan pu. Ni yaa dɔ suuna nimi aawandookaan pu kan, ni dakl lik nimina mbamɔm man.

⁵ Toor man kitork ki tok na tii Uwumbɔr, ki di naadii tii u.

⁶ Binib pam le mee ke: “Uwumbɔr, moo tii timi saanyoor. San timi kinimbaak.”

⁷ Le saah tii mi mpopiin mu na jer baah ga di tijikaar ni ndaan sakpen kan mpopiin mu na.

⁸ M yaa doon kan, le m geen suuna; Uwumbɔr, sin baanja le kii mi mbamɔm.