Ilahn 37 - Uwumbɔr aagbaŋ

Bibiindam ni bininyaam aadoon aah ga li bi pu na

¹ Taa cha bibiindam aabɔr muk si; taa li kpa lipiipoln binib bi tun taani na pu.

² Bi ga wɔŋ ke timoor ti kuur na la; bi ga kpoi ke tisufar ti yɔl na la.

³ Di naadii tii Uwumbɔr, ki li ŋani ni ŋan na; li bi kitiŋ kee pu ki li kpa limɔfal.

⁴ Li ban saamɔɔn Uwumbɔr chee, le u ga tii si aasui aah ban pu na.

⁵ Di aabaa tii Uwumbɔr; di naadii tii u, aan u ter si;

⁶ U ga cha saah ŋan pu na li wiin ke nwiin pu aawiin na.

⁷ Ji limɔr ki li kii Uwumbɔr aah ga ŋa pu na; taa cha binib bi kani nkam na, bee bi kani tinyoor baatunwanbir aatun ponn ni na aabɔr li muk si.

⁸ Taa cha nsuubiin ni liŋuul aabɔr nyaŋ si; ni ga di si buen tibɔr ni la.

⁹ Binib bi di naadii tii Uwumbɔr na le ga li yeh kitiŋ kee, le Uwumbɔr ga jenn nyan bibiindam ma.

¹⁰ Naan yunn le bibiindam ga wɔŋ; aa ga lik ban bi, ki mu aan kan bi;

¹¹ binib bi sunn bibaa taab na le ga li yeh kitiŋ kee, ki ji tinyoor ni nsuudoon aamɔɔn.

¹² Ubiindaan kpokl ki ban uninyaan la, le ki lik u ni kinanaŋ.

¹³ Le Uwumbɔr ma laa bibiindam, ba pu? u nyi ke naan yunn le bi kuln.

¹⁴ Bibiindam ŋɔi baajaak aajum le ki moo pel baatɔi ke bi ku bigiim bi kaa kpa nibaa na, ke bi kɔr binib bi tun ni ŋan na;

¹⁵ le bibaa aajaak aajum ga ku bi, le baatɔi mu ga kool.

¹⁶ Uninyaan aah kpa siib ni na jer bibiindam mɔmɔk aawangol,

¹⁷ ba pu? Uwumbɔr ga gaa bibiindam aapɔɔn, le ki tee li kiir bininyaam.

¹⁸ Uwumbɔr le kiir binib bi keei waamɔb na, bima le ga li yeh kitiŋ kee ki ti saa n‑yoonn mu kaa kpa ndoon na.

¹⁹ N‑yoonn yaa kaa nan ki ŋan kan, baan ji falaa; le nkon aayoonn kan, bi ga li kpa ni ŋeer bi na.

²⁰ Le bibiindam ma ga tee kpoi, Uwumbɔr aadim ga wɔŋ ke nsupuun na la; bi ga wɔŋ ke iŋmanyuu na la.

²¹ Ubiindaan yaa pinn tiwan kan, waa ki teeni, le uninyaan ma tii waapiin usui mɔmɔk.

²² Uwumbɔr aah ŋa waanyoor ŋa binib bi pu na le ga li yeh kitiŋ kee, le waah puun lii binib bi pu na ma ga yaa koo timoor ni.

²³ Uwumbɔr le mɔk unii nsan mu u ga dii na, le ki kii binib bi unimbil gbiin bi na.

²⁴ Bi yaa lir kan, baan doon kitiŋ, ba pu? Uwumbɔr le ter bi.

²⁵ Dandana m ye uninkpel la; m yunn pam, le maa kee kan ke Uwumbɔr siir cha bininyaam, ki mu aa kee kan ke baabim chuun mee tijiir.

²⁶ N‑yoonn mɔmɔk kan, bi tii la, le ki pinni tii binib biken kaa gaal nibaa, le baabim mu ye bi tinyoor.

²⁷ Fenn aapuwɔb tii titunwanbir, ki li ŋani ni ŋan na, le aayaabitiib nan li bi kitiŋ kee pu n‑yoonn mɔmɔk,

²⁸ ba pu? Uwumbɔr gee tiwan ni ŋan na la, kaa siir cha waanib bi dii u mbamɔm na. U kii bi n‑yoonn mɔmɔk, le ki ga jenn nyan bibiindam ma.

²⁹ Bininyaam le ga li yeh kitiŋ kee, ki ga li bi ki pu ki ti saa n‑yoonn mu kaa kpa ndoon na.

³⁰ Uninyaan aamɔbon ye nlan la, le ki kpa ibamɔn n‑yoonn mɔmɔk.

³¹ U joo Waawumbɔr aakaal usui ni la, le kaa yenni i chee.

³² Ubiindaan lik uninyaan aah chuun pu na la, le ki pɔɔni ubaa ke u ku u;

³³ le Uwumbɔr aan di u ŋa waadim aaŋaal ni, ki mu aan cha bi bui ke waabɔr aa ŋan, buyoonn bi bi ji u tibɔr na.

³⁴ Li kpa Uwumbɔr pu limakl, ki kii tii waamɔbon; waah ga nyuŋ si pu na le ye ke u di kitiŋ kee tii si, le aa ga kan ke u jenn nyan bibiindam.

³⁵ M nan nyi ubiindaan ubaa, le u nan kpa mbiin ni ti nyaŋ; u nan ti jer binib mɔmɔk pu ke Lebanonn aasui i fɔk sakpen na la;

³⁶ Puwɔb le m nan ki jer nima le waa nan ki bi; m nan ban u le kaa ki kan u.

³⁷ Lik bee uninyaan, lik unii u ŋan na mbamɔm unii u kpa nsuudoon na kpa yaabitiib la,

³⁸ le titunwanbirdam ma kulni la, le bi ŋar biyaabitiib ŋŋaan.

³⁹ Uwumbɔr le gaal binib bi ŋan na lir, le ki kii bi tibɔbir aayoonn.

⁴⁰ U ter bi le ki gaal bi lir; u gaal bi bibiindam chee lir, ba pu? bi chaa u chee ti ban nterm.