Ilahn 36 - Uwumbɔr aagbaŋ

Unibɔn aah kpa mbiin pu na

¹ Ubiindaan aasui ponn ni ye titunwanbir la; u yii Uwumbɔr kaa pak u.

² U dak ke waah nyuun sakpen pu na, Uwumbɔr aan ŋmaa kan waatunwanbir ki bui ke taa ŋan.

³ Waabɔlen ye mbiin ŋmeen, le ki gbii inyamɔn; waa ki kpa nlan, kaa ki ŋani tiwan ni ŋan na.

⁴ U yaa dɔ kan, u dak ilandak i kaa ŋan na la; waatun mɔmɔk aa ŋan, le kaa yiil titunwanbir aatuln.

Uwumbɔr aah ŋan pu na

⁵ Uwumbɔr, saageehm mu bi n‑yoonn mɔmɔk na fuu paacham, le saaŋann taln ti fuu kitaapaak.

⁶ Saah ŋan sakpen pu na naahn ŋijoo aah paa pu na la; le saabamɔn naahn nnyusakpem aah nyoo pu na. Sin le lik unibɔn ni tiwakor mɔmɔk.

⁷ Uwumbɔr, saageehm mu bi n‑yoonn mɔmɔk na jer liwangol mɔmɔk la, ti kan mbɔbɔryaan aa chee ke ikoobi aah kani pu ina aafeen taab na.

⁸ Saah tii timi tijikaar sakpen ti na le kpiini timi; le ti nyu nnyun saaŋann aamɔɔ na ni.

⁹ Sin chee le limɔfal mɔmɔk nya ni, le saawiihn cha ti waa nwiihn.

¹⁰ Tɔ, li beenin gee binib bi nyi si na, ki ŋa bininyaam tiŋann.

¹¹ Taa cha kigaadam tak mi, ki taa cha bibiindam faan mi aan m san.

¹² Lik titunwanbirdam aah lir nin chee na. Bi dɔ nima le kaa ki ŋmaa fii.