Ilahn 34 - Uwumbɔr aagbaŋ

David nan ŋmann ke u ye uwaar Ubɔr Abimelek chee, le u jenn u. Nee aapuwɔb le David gaa nlahn mumina.

¹ M ga li dooni Uwumbɔr n‑yoonn mɔmɔk; m ga li pak u n‑yoonn mɔmɔk.

² M ga pak u waah ŋa tiwan ni na pu; cha binib bi bi limukl ni na li ŋun aan bisui piir.

³ Cha m ni nimi kpaan man ki moon Uwumbɔr aah kpa mpɔɔn pu na; cha ti kpaan ki pak waayimbil man.

⁴ M mee Uwumbɔr, le u gar mi, u nyan mi maajawaan mɔmɔk ni.

⁵ Baah muk binib bi na di bibaa tii u, le bisui piir; baan ji inimɔɔn kpala.

⁶ Binib bi kaa kpa biteterb na yin uma la, le u gar bi; u nyani bi baabɔr mɔmɔk ni.

⁷ Uwumbɔr aatuun le kii binib bi keei waamɔb na, le ki nyani bi linimaln ni.

⁸ Nimi nibaa lik man ki kan Uwumbɔr aah kpa tiŋann pu na. Binib bi kan ŋŋmarm u chee na le kpa mpopiin.

⁹ Uwumbɔr aanib mɔmɔk, kii waamɔb man; binib bi keei waamɔb na kani baah ban nimɔk na.

¹⁰ Hali ichinn chuun nkon, kaa kani tijiir, le binib bi keei Uwumbɔr aamɔb na aa lann tiwan ni ŋan na nibaa.

¹¹ Njɔtiib bi laa ye binachipɔm na, dan man, ki nan ŋun m chee man, aan m mɔk nimi ni nyuŋ Uwumbɔr.

¹² Aa ban ke aa ji tinachipɔnn aa? Aa ban limɔfal li mɔ ki fɔk na aa?

¹³ Kina kan, taa len tibɔbir, ki taa mɔnn inyamɔn.

¹⁴ Fenn aapuwɔb tii titunwanbir, ki tun lituln li ŋan na; di aasui mɔmɔk ban nsuudoon linimaln.

¹⁵ Uwumbɔr lik binib bi aabimbin ŋan na pu, le ki ŋun baawiil pu;

¹⁶ ki yiil binib bi tun titunwanbir na, le bi yaa kpo kan, bi suln bibɔr mala.

¹⁷ Binib bi aabimbin ŋan na yin Uwumbɔr, le u ŋun; u nyani bi baabɔr mɔmɔk ni.

¹⁸ Uwumbɔr bi duun binib bi aataakpab yɔl na la; le ki gaal binib bi kaa ki kpa limakl libaa na lir.

¹⁹ Uninyaan kani ŋimuk aabɔŋ aabɔŋ la, le Uwumbɔr nyani u ŋi mɔmɔk ni;

²⁰ Uwumbɔr le bii u pu mbamɔm, le waakpab ponn ni libaa aan koo.

²¹ Titunwanbir le ga ku mbiindam; u ga daa binib bi kaa gee bininyaam na aatafal.

²² Uwumbɔr ga gaa waanib lii; binib bi chaa u chee ke u li kii bi na ga ŋmar.